Goa Crime: पूलपार्टीमध्ये नशेचा द्रवपदार्थ देऊन पुण्यातील युवतीवर लैंगिक अत्याचार, धमकीचे फोन; संशयिताचा जामीन रद्द करण्याची मागणी

पणजी: हणजूण येथील एका कॅसिनो मालकाचा मुलगा असलेला बलात्कार प्रकरणातील संशयित सोहेल सय्यद याच्याविरुद्धचा गुन्हा गंभीर असताना त्याला पणजी अतिरिक्त सत्र न्यायालयाने दिलेला सशर्त जामीन रद्द करण्यासाठी पुण्यातील पीडितेने मुंबई उच्च न्यायालयात फौजदारी याचिका सादर केली आहे. त्यावरील सुनावणी येत्या ७ एप्रिलला ठेवली आहे.

पुण्यात इंटर्न करत असलेली १८ वर्षीय पीडित तरुणी आपल्या आईसोबत २१ जून २०२४ रोजी गोव्यात सुट्टी घालवण्यासाठी आली होती व ती मांद्रे येथील एका रिसॉर्टमध्ये थांबली होती. गोव्यात सांजावच्या दिवशी ती आपल्या मैत्रिणीसोबत एका हॉटेलात पूल पार्टीसाठी गेली होती.

या पार्टीत तिच्यासह मित्रमैत्रिणी मिळून सहाजण होते. त्यामध्ये संशयिताचाही समावेश होता. या पार्टीवेळी या सर्वांनी मद्यप्राशन केले होते. या मद्यामध्ये नशा येणारे द्रव्य मिसळून पीडितेला देण्यात आले. रात्रभर ही पार्टी सुरू असताना संशयिताने ती नशेमध्ये असल्याचा गैरफायदा घेऊन तिचे लैंगिक शोषण केले होते.

तिच्या शरीरावर गंभीर जखमाही होत्या. त्यानंतर ती शुद्धीवर येऊन घरी परतल्यावर तिच्या आईने तिची अवस्था पाहून एका खासगी इस्पितळात दाखल केले असता तिचे लैंगिक शोषण झाल्याचे वैद्यकीय तपासणीत स्पष्ट केले. गोमेकॉ इस्पितळातही तिची तपासणी केली त्यामध्येही तोच अहवाल समोर आला. यासंदर्भातची तक्रार पीडित तरुणी व तिची आई हणजूण पोलिसांत देण्यास गेली असता संशयिताच्या वडिलांच्या हणजूण भागात असलेल्या वर्चस्वामुळे पोलिसांनी ती न घेता परत पाठवले होते.

पीडित तरुणीला धमकीवजा फोन

बलात्काराच्या घटनेनंतरच्या काळात पीडितेला पुण्याला गेल्यावर धमकीचे फोन येऊ लागले त्यामुळे तिची आई वकिलाला सोबत घेऊन पुन्हा ४ ऑक्टोबर २०२४ रोजी गोव्यात आली व हणजूण पोलिसांत तक्रार दाखल केली. त्यानंतर पोलिस चक्रे वेगाने फिरली. त्यानंतर संशयित सोहेल सय्यद याला अटक झाली.

अतिरिक्त सत्र न्यायालयाने हा गंभीर गुन्हा असतानाही संशयिताला सशर्त जामीन दिला. एका तरुणीला मद्यातून नशा पाजून तिच्यावर लैंगिक अत्याचार करण्यासारखा गंभीर गुन्हा होऊनही तसेच कोठडीत असताना धमकीवजा फोन केल्याने न्यायालयाने दिलेला जामीन योग्य नाही, तो रद्द करण्यात यावा, अशी बाजू याचिकेत मांडण्यात आली आहे.