गोव्यात पर्यटकांची सतावणूक; तीन महिलांना अटक

म्हापसा : कोल्हापूर जिल्ह्यातील चंदगड भागातून गोव्यात आलेल्या पर्यटकांची सतावणूक व मारहाण प्रकरणी म्हापसा पोलिसांनी संबंधित ब्यूटी पार्लरमधील तीन महिलांना अटक केली आहे. या प्रकरणाची राज्य सरकारने गंभीर दखल घेतली होती. पर्यटनमंत्री रोहन खंवटे यांनी लक्ष दिल्याने या विषयाला चालना मिळाली. (Persecution of tourists in Goa three women arrested)

काहींनी चंदगड येथील पर्यटकांना मारहाण करून त्यांची लुटमार केली होती. सोशल मीडियावर या प्रकरणाची मोठ्या प्रमाणात चर्चा झाली. कोट्यवधी लोकांनी तक्रार संबंधित व्हिडीओ पाहिला. गोव्याचे नाव सर्वत्र खराब होऊ लागल्याने मंत्री खंवटे यांनी मंगळवारी म्हापसा स्थानकाला भेट देत निरीक्षकांना काही सूचना दिल्या.

तीन संशयित महिलांना 14 दिवसांची न्यायालयीन कोठडी सुनावली आहे. त्या सर्व नेपाळच्या रहिवासी आहेत. सदर मारहाण व लुबाडणुकीचा हा प्रकार दि. 24 मे रोजी म्हापसा येथील श्री बोडगेश्वर मंदिरानजीक रस्त्यावर घडला होता. यापूर्वी पोलिसांनी तीन पुरुष संशयितांना अटक केली होती. ते सध्या पोलिस कोठडीत आहेत.

पर्यटकांच्या बाबतीत घडलेली ही कृती अतिशय गंभीर आहे. विद्यार्थ्यांना गोमंतकीयांकडून मिळालेली वागणूक अयोग्य आहे. हे प्रकरण गोव्याच्या पर्यटन विकासाच्या बाबतीत धोकादायक आहे.

- रोहन खंवटे, पर्यटनमंत्री