'CM येत नाहीत तोवर एक इंचही मागे हटणार नाही'; Goa Miles विरोधात टॅक्सी व्यावसायिक आक्रमक, पेडण्यात 'चक्का जाम'

Pernem Taxi operators chakka jam

पेडणे: मोपा विमानतळावरी गोवा माईल्सच्या टॅक्सी काउंटर विरोधात टॅक्सी व्यावसायिक आक्रमक झाले आहेत. व्यावसायिकांनी पेडण्यात विविध मागण्यांसाठी चक्का जाम केला आहे. उपजिल्हाधिकारी कार्यालयालसमोर एकवटत मुख्यमंत्री डॉ. प्रमोद सावंत घटनास्थळी येऊन ठोस आश्वासन देत नाहीत तोवर एक इंचही मागे हटणार नाही, असा पवित्रा टॅक्सी चालकांनी घेतला आहे.

मोठ्या प्रमाणावर एकवटलेल्या आंदोलनकर्त्या टॅक्सी व्यावसायिकांच्या पार्श्वभूमीवर मोठा पोलिस बंदोबस्त तैनात करण्यात आला आहे.

टॅक्सी चालकांच्या या चक्का जाम आंदोलनात मोठ्या संख्येने चालक, सामाजिक कार्यकर्ते आणि राजकीय नेत्यांनी सहभाग घेतला आहे. सकाळी मोपा येथील देव बाराजण येथे प्रार्थना करुन टॅक्सी व्यावसायिकांनी चक्का जाम आंदोलनास सुरुवात केली.

हजारो टॅक्सी चालकांचा सहभाग असलेल्या या आंदोलनाने पेडण्यातील उपजिल्हाधिकारी कार्यालयावर धडक दिली. कार्यालयासमोर आंदोलकांनी घोषणाबाजी केली.

मुख्यमंत्री डॉ. प्रमोद सावंत घटनास्थळी भेट देऊन ठोस आश्वासन देत नाही, तोवर एक इंचही मागे घटणार नाही, असा पवित्रा आंदोलकांनी घेतला आहे. दरम्यान, घटनास्थळी मोठा पोलिस फौजफाटा तैनात करण्यात आला आहे.

पेडणेकरांना मोपा विमानतळावर ब्ल्यु टॅक्सीसाठी परवाने दिलेत पण, विमानतळावरील इतर काउंटर्समुळे त्यांना व्यवसाय करण्यासाठी अडचणी येत असल्याची तक्रार टॅक्सी चालकांनी केली आहे.

पेडण्यातील चक्का जाम बाबत टॅक्सी चालकांनी बुधवारी (२१ ऑगस्ट) माहिती दिली होती. सकाळी देव बाराजणचे दर्शन घेऊन टॅक्सी व्यावसायिकांनी आंदोलनास सुरुवात केली आहे.