Pernem Municipality: पेडणे नगराध्यक्षांची ग्वाही कामगारांकडून आंदोलन स्थगित

Pernem Municipality: पेडणे पालिकेच्या हंगामी दहा ते बारा कामगार व चार कायमस्वरूपी कर्मचाऱ्यांना मागच्या दोन आणि चार महिन्यांचा पगार मिळाला नसल्याच्या निषेधार्थ पेडणे पालिकेच्या कर्मचारी, कामगारांनी मंगळवार, 3 रोजी पालिकेसमोर धरणे आंदोलन सुरू केले होते.

गोमंतक मजूर संघामार्फत या कर्मचाऱ्यांनी धरणे आंदोलनाला सुरवात केली होती. त्यावेळी संघटनेचे अध्यक्ष पुती गावकर यांनी मुख्याधिकारी अनंत मळीक, नगराध्यक्ष सिद्धेश पेडणेकर यांच्याकडे चर्चा केली. त्यावेळी नगराध्यक्ष सिद्धेश पेडणेकर यांनी तीन दिवसांच्या आत या कामगार, कर्मचाऱ्यांचा पगार दिला जाईल.

शिवाय ‘पीएफ’विषयी आपण मुख्याधिकाऱ्यांशी चर्चा करून योग्य तो निर्णय घेतला जाईल व त्यांच्या फंडाचा जो निधी आहे. तो निधीही यापूर्वीच एका एजन्सीकडे सुपुर्द केला असून त्या एजन्सीने ‘पीएफ’मध्ये तो निधी गुंतवला नसल्याचे सिद्धेश पेडणेकर यांनी सांगून आपणही यात लक्ष घालणार असे आश्वासन दिले. त्यानंतर कामगारांनी हे आंदोलन स्थगित ठेवण्याचा निर्णय घेतल्याचे गावकर यांनी सांगितले.

या आंदोलन करणाऱ्या कामगार, कर्मचाऱ्यांना गोवा फॉरवर्डचे नेते दीपक कळंगुटकर यांनी आपला पूर्ण पाठिंबा दर्शविला. पालिकेचे कर्मचारी ३६५ दिवस परिसराची स्वच्छता करतात आणि त्यांना हक्काचा पगार मिळत नाही. सरकारने त्यांच्या पगाराची लवकरात लवकर तरतूद करावी. जर सरकारला जमत नसेल तर पेडणे पालिका बरखास्त करून तिचे पंचायतीमध्ये रूपांतर करावे, अशी मागणी यावेळी दीपक कलंगुटकर यांनी केली.