Goa Mining: अन्‍य राज्यांना गोव्यातून खनिज माल निर्यात करण्यास परवानगी

Goa Mining: खनिज निर्यातीस प्रोत्साहन देण्यासाठी राज्य सरकारने इतर राज्यातील निर्यातदारांना गोव्यातून खनिज माल निर्यात करण्यास परवानगी दिली आहे. मंत्रिमंडळानेच असा निर्णय घेतला असून खनिज खात्याच्या वतीने हा बदल अधिसूचित करण्यात आला आहे,

अशी माहिती खाण खात्याच्या वतीने देण्यात आली आहे. याचा राज्याच्या अर्थव्यवस्थेवर सकारात्मक परिणाम होणार आहे.

खाण खात्याचे संचालक डॉ. एस. शानभोग यांनी दिलेल्या माहितीनुसार, यापुढे इतर राज्यांतील निर्यातदार, खनिज व्यावसायिक, ई-लिलावातील यशस्वी बोलिधारक गोव्यातून खनिज निर्यात करू शकतात.

याचा फायदा राज्यातील खनिज ने-आण करणारे ट्रक, बार्ज व्यावसायिक, मुरगाव पोर्ट प्राधिकरणाला होणार आहे. खनिज व्यावसायिकांच्या व्यवसाय वाढीसह राज्याच्या अर्थव्यवस्थेलाही याचा फायदा होणार आहे.

ट्रक, बार्ज व्यवसाय पुनर्जिवीत

केंद्र सरकार आणि सर्वोच्च न्यायालयाने घातलेल्या बंदीमुळे राज्यात 2014 पासून खनिज व्यवसाय बंद आहे. याचा विपरित परिणाम या व्यवसायावर अवलंबून असलेल्या ट्रक, बार्ज व्यवसायावर झाला असून तेव्हापासून हा व्यवसाय पूर्णतः ठप्प आहे.

आता राज्य सरकारने घेतलेल्या या नव्या निर्णयामुळे हे दोन्हीही व्यवसाय पुनर्जीवित होतील अशी अपेक्षा असून याचा सर्वात मोठा लाभ मुरगाव बंदर प्राधिकरणाला होणार आहे.