Government Jobs : गोमंतकीयांनी सरकारी नोकरीचा विचार करणं सोडून द्यावं

CM Pramod Sawant : गोव्यातील लोकं केवळ सरकारी नोकरीचा विचार करतात. मात्र आता लोकांनी एलडीसी जॉबचा विचार करणं सोडून द्यावं. लोकांनी आता चांगल्या खासगी क्षेत्रातील नोकरीच्या संधी शोधाव्यात असं वक्तव्य गोव्याचे मुख्यमंत्री डॉ. प्रमोद सावंत यांनी केलं आहे. गोवा सरकार राज्यात प्रदूषणविरहित प्रकल्प आणि नोकरीच्या संधी आणण्याच्या प्रयत्नात आहेत, असंही त्यांनी स्पष्ट केलं.

आयटी क्षेत्रातील कंपन्याही गोव्यात कशा आणता येतील याचाही सरकार विचार करत आहेत. यातून गोव्यात मोठ्या प्रमाणावर नोकरीच्या संधी उपलब्ध होणार आहेत. त्यामुळे गोमंतकीय तरुणांनी या खासगी क्षेत्रातील संधी आजमावण्याचं आवाहन मुख्यमंत्र्यांनी केलं आहे. सरकारी नोकरीच्या मोहजालातून बाहेर पडण्यासाठी शिक्षकांनी विद्यार्थ्यांचं समुपदेशन करावं. पालकांपेक्षा शिक्षकांच्या समुपदेशनाचा विद्यार्थ्यांच्या विचारसरणीवर खोलवर परिणाम होतो. त्यामुळे शिक्षकांनीही या समुपदेशनासाठी पुढाकार घ्यावा, असं मुख्यमंत्री म्हणाले.

दरम्यान कालच मुख्यमंत्र्यांनी सांगेतील प्रस्तावित आयआयटी प्रकल्पाची पायाभरणी 6 महिन्यात करणार असल्याचं वक्तव्य केलं होतं. एका जाहीर कार्यक्रमात त्यांनी सांगे आयआयटीला विरोध करणाऱ्यांचाही पुरता समाचार घेतला. या प्रकल्पामुळे स्थानिकांना रोजगाराच्या संधी उपलब्ध होणार असून विविध व्यवसायांना चालना मिळणार असल्याचा विश्वासही त्यांनी व्यक्त केला होता.

येत्या सहा महिन्याच्या आत आयआयटीचीही पायाभरणी केली जाणार असल्याची घोषणा डॉ. प्रमोद सावंत यांनी केली. या प्रस्तावित आयआयटी तसेच गोव्यात येणाऱ्या इतर प्रकल्पात स्थानिकांना प्राधान्य दिले जाणार असल्याचेही त्यांनी स्पष्ट केलं आहे. तसंच या प्रकल्पासोबत रोजगाराच्या विविध संधी गोमंतकीयांसाठी उपलब्ध होणार असून केवळ सरकारी नोकरीच्या मागे न धावता गोमंतकीयांनी खासगी क्षेत्रातील संधी शोधण्याचं आवाहन मुख्यमंत्र्यांनी केलं आहे.