Dabolim Bogmalo: हजारो लिटर्स पाणी वाहून गेले, कंत्राटदाराला दंड करा; दाबोळी-बोगमाळे ग्रामस्थांची मागणी

वास्को: दाबोळी-बोगमाळो चौकात रस्ता रुंदीकरणाचे काम करताना फोडलेल्या जलवाहिनीतून हजारो लिटर्स पाणी वाहून गेल्याप्रकरणी कंत्राटदाराकडून पाणीपुरवठा खात्याने किती दंड आकारला आहे, असा प्रश्न स्थानिकांकडून विचारला जात आहे. अशा कंत्राटदारांकडून दंड वसूल केला पाहिजे, शिवाय पुन्हा असे कृत्य करणार नाही, यासाठी कठोर कारवाई करायला हवी, असे मत दाबोळी-बोगमाळे येथील ग्रामस्थांनी व्यक्त केले.

बरेच पाणी वाया गेले, तरीही पाणीपुरवठा खाते संबंधित कंत्राटदाराविरोधात कारवाई करण्यास कचरत असल्याचे दिसून येत आहे. या प्रकरणी कायद्यानुसार दंड आकारण्याची गरज होती. परंतु मांजराच्या गळ्यात घंटा कोण बांधणार? हा प्रश्न उपस्थित होत आहे. वीज खात्याचे कार्यकारी अभियंते काशिनाथ शेट्ये यांचे उदाहरण घेऊन पाणीपुरवठा विभाग कारवाई करण्याची हिंमत दाखवतील काय? असा प्रश्‍न नागरिकांकडून विचारण्यात येत आहे.

दाबोळी-बोगमाळो चौकात उड्डाण पुलाचे काम तसेच रस्ता रुंदीकरणाचे काम सुरू आहे. यासंबंधी कंत्राटदाराने म्हणावी, तशी खबरदारी घेतली नाही. त्यामुळे येथे वाहनचालकांना जीव मुठीत घेऊन वाहने हाकावी लागत आहेत, तर आसपासच्या आस्थापनांना धुळीचा त्रास सहन करावा लागत आहे. येथे काम करताना संबंधित सरकारी यंत्रणेला विश्र्वासात घेतले जात नाही. त्यामुळे रस्ता रुंदीकरणाचे काम करताना गेल्या दोन दिवसांत दोन ठिकाणी जेसीबीमुळे जलवाहिनीचे नुकसान झाले आहे.

गुरुवारी (ता. १७) सकाळी जेसीबीमुळे तेथील जलवाहिनीचे नुकसान झाल्याने हजारो लिटर्स पाणी वाहून गेले. याप्रकरणी पाणीपुरवठा विभागाने कायद्यानुसार त्या हजारो लिटर्स पाण्याचे पैसे वसूल करण्याची गरज होती. तथापि अधिकारी त्या कंत्राटदारासमोर उभे राहण्यासही कचरत आहे. त्यामुळे दंड वसूल करण्याचे दूरच राहिले. तेच जर सर्वसामान्याकडून एखाद्या जलवाहिनीला नुकसान झाले असते, तर त्या व्यक्तचा पाणीपुरवठा बंद केला असताच शिवाय दंडही आकारला असता असे बोलले जात आहे.

मीटर नसतानाही ‘बिल’

झुआरीनगर येथे एका व्यक्तीने घराची दुरुस्तीचे काम सुरू केले होते. यावेळी पाणीपुरवठा विभागाला कुणकुण लागताच एका अभियंत्याने तेथे जाऊन त्या व्यक्तीचे पाणी पुरवठा बंद केलाच शिवाय मीटर्सही काढून नेला. दुरुस्तीसाठी तू नळाचे पाणी वापरतो आहे, ते नियमात बसत नाही, असे सांगितले. त्यानंतर त्याला पुन्हा कनेक्शन पाहिजे असल्यास तू नवीन अर्ज कर, मीटरचे पैसे भर, इतर सोपस्कार कर, असे वगैरे सांगण्यात आले. आश्र्चर्याची गोष्ट म्हणजे त्याचा मीटर काढून नेला असतानाही त्याला महिन्याचे बिल पाठविण्यास पाणीपुरवठा विभाग विसरले नाहीत.