Bicholim: डिचोलीत खासगी प्रवासी बसगाड्या बंद राहिल्याने प्रवाशांची गैरसोय

Bicholim News: विविध मार्गावर धावणाऱ्या बहुतेक खासगी प्रवासी बसगाड्या सोमवारी (ता.६) बंद राहिल्याने प्रवाशांची प्रचंड गैरसोय झाली. प्रवासी बसगाड्यांअभावी सायंकाळी डिचोलीत प्रवासी अडकून पडले. सकाळी ते दुपारपर्यंत डिचोली (Bicholim) बसस्थानकावर तर विविध ठिकाणी जाणारे प्रवासी बसच्या प्रतीक्षेत ताटकळत राहिल्याचे आढळून येत होते.

मिळालेल्या माहितीनुसार, काही खासगी प्रवासी बसगाड्या निवडणूक प्रक्रियेसाठी वापरण्यात आल्याने सोमवारी बहुतेक खासगी प्रवासी बसगाड्या बंद होत्या. परिणामी बहुतेक बसगाड्यांची नियोजित मार्गावरील वाहतूक सेवा बंद होती.

बहुतेक खासगी प्रवासी बसगाड्या बंद राहिल्याने इच्छितस्थळी जाण्यासाठी बाहेर पडलेल्या प्रवाशांची कुचंबणा झाली. बहुतेक प्रवासी अडकून पडले. ‘कदंब’च्या आणि मोजक्याच खासगी प्रवासी बसगाड्या धावताना दिसून येत होत्या. बऱ्याच वेळानंतर एखादी बसगाडी बसस्थानकावर येत होती. बसगाडी येताच बसमध्ये चढण्यासाठी गर्दी होत होती.

प्रवाशांना भुर्दंड

बहुतेक बसगाड्या बंद राहिल्याने अनेक प्रवासी अडकून पडले. असे एक प्रवासी आनंद गावकर यांनी सांगून, या गैरसोयीबद्धल तीव्र नाराजी व्यक्त केली. बसगाड्या बंद राहिल्याने काही प्रवाशांनी तर भाड्याची मोटरसायकल तसेच रिक्षा करून इच्छित स्थळ गाठले. त्यामुळे त्यांना अधिक पैसेही मोजावे लागले.