Paroda Bridge : पारोडा येथील पूल तीन दिवस पाण्याखाली

केपे गेल्या तीन दिवसांपासून कुशावती नदीतील पाण्याची पातळी वाढली असल्याने पूरसदृश स्थिती निर्माण झाली आहे. परोडा पर्वत येथे मुख्य रस्ता व पूल गेल्या तीन दिवसांपासून पाण्याखाली गेल्याने वाहतूक विस्कळित झाली आहे.

७ रोजी जोरदार पाऊस पडल्याने पारोडा पूल व रस्ता पाण्याखाली गेला होता. १४ रोजी परत एकदा या रस्त्यावर पाणी आले होते, ते अजून उतरण्याचे नाव घेत नसल्याने मडगाव ते केपे रस्त्यावरून होणारी वाहतूक चांदरमार्गे वळविण्यात आली आहे.

त्यामुळे मडगावला कामानिमित्त जाणाऱ्या लोकांचे बरेच हाल होत आहेत. पारोडा पुलाजवळ असलेल्या काही घरातील लोक आपल्या घरात अडकून पडले आहेत. त्यांना केपे किंवा मडगावलाही जाता येत नसल्याने त्यांच्यापुढे गंभीर समस्या निर्माण झाली आहे.