पणजी: करंझाळे येथे कार्यकर्ते रामा काणकोणकर यांच्यावर झालेल्या प्राणघातक हल्ल्याचे पडसाद राज्याच्या राजकारणात मोठ्या प्रमाणावर उमटत आहे. या घटनेविरोधात विविध पक्षांचे नेते आणि कार्यकर्ते रस्त्यावर उतरले असून सरकारविरोधी वातावरण चांगलेच पेटले आहे.
शुक्रवारी पणजीतील चर्च स्क्वेअर परिसरात लोप युरी आलेमाओ, विजय सरदेसाई, आमदार वीरेश बोरकर, गोवा प्रदेश काँग्रेसचे अध्यक्ष अमित पाटकर आणि गोवा आपचे अध्यक्ष अमित पालेकर यांच्यासह अनेक आंदोलक जमले.
त्यांनी घोषणाबाजी करत सरकारवर कायदा-सुव्यवस्था ढासळल्याचा आरोप केला. आंदोलकांनी मुख्यमंत्र्यांच्या निवासस्थानाकडे मोर्चा नेण्याचा प्रयत्न केला; मात्र पोलिसांनी त्यांना तेथून रोखले.
या आंदोलनादरम्यान अमित पाटकर यांनी गोवा बंदचं आवाहान केलंय. "हा हल्ला केवळ एका कार्यकर्त्यावर नाही, तर गोव्याच्या लोकशाहीवरच हल्ला आहे. राज्यात गुंडगिरी बळावली आहे, सरकार पूर्णपणे अपयशी ठरले आहे. या हल्ल्याविरोधात सर्व गोमंतकीयांनी एकत्र यावे," असे आवाहन त्यांनी केले. तसेच, सोमवारी गोवा बंदचे आवाहन काँग्रेसकडून करण्यात आलं आहे.
हल्ल्यामागील सूत्रधार कोण?
या प्रकरणावर प्रतिक्रिया देताना विरोधी पक्षनेते युरी आलेमाव यांनी सरकारवर निशाणा साधला आहे. "सरकारमधील लोकांशी संबंधित व्यक्तींनीच हा हल्ला घडवून आणला आहे. गोव्यातील नागरिक खरोखर सुरक्षित आहेत का? या हल्ल्याची योजना कोणी आखली आणि यामागील खरा सूत्रधार कोण आहे हे शोधणे गरजेचं आहे. या घटनेची सखोल चौकशी करून आरोपींना कठोर शिक्षा व्हायला हवी. आम्ही या भ्याड कृत्याचा तीव्र निषेध करतो," अशा शब्दात आलेमाव यांनी सरकारवर टिका केलीय.
मोठ्या प्रमाणावर जमलेल्या निदर्शकांना नियंत्रणात ठेवण्यासाठी पोलिसांनी भाजप मुख्यालय परिसरात कडेकोट बंदोबस्त ठेवला होता. या काळात काही ठिकाणी तणाव निर्माण झाला, परंतु पोलिसांनी परिस्थिती नियंत्रणात आणली.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.