Panaji: पणजीवासीयांसाठी गुड न्यूज! रस्ते, सांडपाणी निचऱ्याची कामे संपली; पदपथ सौंदर्यीकरणासाठी 30 जूनपर्यंत मुदत

Panaji Smart City News: पणजी स्मार्ट सिटी योजनेखाली शहरातील रस्त्यांची तसेच सांडपाणी निचऱ्याची कामे पूर्ण झाली आहेत, त्याची छायाचित्रासह माहिती दिली. काही किरकोळ कामे उरली आहेत. पदपथावरील सौंदर्यीकरणाच्या कामासाठी ३० जूनपर्यंत मुदत आहे, अशी माहिती ॲडव्होकेट जनरल देविदास पांगम यांनी दिल्याने गोवा खंडपीठाने ही सुनावणी येत्या १५ जुलैपर्यंत तहकूब केली आहे.

दोन वर्षांपूर्वी पणजी शहरातील रस्त्यांच्या कामाची तसेच भूमिगत सांडपाणी व मलनिस्सारण वाहिनींसाठी खोदण्यात आलेल्या कामामुळे रस्त्यांच्या बाजूने निवासी लोकांना व आस्थापनांना धूळ समस्या तसेच वाहतुकीची अडचण भासली होती.

त्यामुळे यासंदर्भात दोन वेगवेगळ्या याचिका उच्च न्यायालयात सादर झाल्या होत्या. या याचिकांची गंभीर दखल घेत गोवा खंडपीठाने सरकारला या कामांवर देखरेख ठेवण्यासाठी नोडल अधिकाऱ्याची नेमणूक करण्याचे निर्देश दिल्यावर कामात सुसूत्रता आली होती. वेळोवेळी कामाचा आढावा खंडपीठाकडून घेण्यात आल्याने ही कामे मार्गी लागली होती.

यावर्षी गेल्या मार्चमध्ये पणजी स्मार्ट सिटी योजनेखाली सुरू असलेल्या कामांसाठी नेमलेल्या नोडल अधिकाऱ्यांनी प्रतिज्ञापत्र सादर करून कामाची माहिती दिली. रस्त्याची व मलनिस्सारण वाहिनीची कामे ३१ मे २०२५ पर्यंत पूर्ण केली जातील तर पदपथावरील सौंदर्यीकरणाची कामे ३० जूनपर्यंत पूर्ण करण्याची हमी खंडपीठाला दिली होती.

त्यानुसार हे काम होत असल्याने खंडपीठानेही समाधान व्यक्त करत उर्वरित कामे पूर्ण करून त्याची माहिती देण्यासाठी ही सुनावणी पुढे ठेवली. याचिकादाराच्या वकिलांनीही ही कामे पूर्ण होत आल्याचे खंडपीठाला सांगितले.