Panaji Market: पणजी मार्केटमध्ये सावळागोंधळ! विक्रेत्यांच्या साहित्यामुळे रस्ताच बंद, स्वच्छतेचे तीनतेरा; सुपरवायझरचेही दुर्लक्ष

पणजी: पणजी महानगरपालिकेच्या मार्केटमध्ये सध्या बेशिस्त दिसून येत आहे. सोपो विक्रेते असो की दुकानदार सर्वच व्यापारी रस्त्याच्‍या मध्यभागापर्यंत आपले साहित्य विक्रीसाठी आणून ठेवून रस्ता अडवीत आहेत. मार्केटमध्ये शिस्त आणण्याचे काम ज्या कामगारांकडे सोपविण्यात आले आहे, त्यांचे याकडे दुर्लक्ष होत आहे. कोणीही कसेही साहित्य ठेवत असल्यामुळे मार्केटची रयाच गेल्यासारखे दिसत आहे.

मार्केटचे चेअरमन बेंटो लॉरीन यांनी ‘गोमन्तक’ला सांगितले की, वारंवार सांगूनही विक्रेते ऐकत नाहीत. आता साहित्य जप्त केल्याशिवाय पर्याय उरणार नाही. याविषयी महापौर आणि आयुक्तांना मार्केटमधील विक्रेत्यांची बेशिस्तीची बाब सांगितली जाईल आणि मगच कारवाईचे पाऊल उचलले जाईल.

विक्रेत्यांना शिस्त लावण्याचे काम खरे तर येथील मार्केट सुपरवायझरचे आहे आणि त्याचा धाकही तेवढा असणे गरजेचे आहे. मार्केट सुपरवायझरचा काहीच धाक दिसत नसल्याने विक्रेते सर्रासपणे मनमानी करताना दिसत आहेत.

सुपरवायझरचे शिस्तीवर आणि स्वच्छतेवर लक्ष असणे गरजेचे आहे. यापूर्वीच्या सुपरवायझरनी काय दिवे लावले होते, हे सर्वज्ञात आहे, परंतु सध्याच्या सुपरवायझरनी आक्रमक भूमिका घेणे आवश्यक आहे. पणजी मार्केट हे शहराचा आरसा दाखवणारे असते, पण तेच जर असे बेशिस्तपणा दाखवित असेल, तर पर्यटकांत काय संदेश जायचा तो जात आहे.

चेअरमनांच्या कृतीकडे लक्ष

भाजीपाला विक्रेते असो की दुकानदार असोत आपला सोपो, दुकान सोडून रस्त्याच्या अर्ध्या भागापर्यंत दुकानाचे साहित्य विक्रीसाठी ठेवत आहेत. रस्त्यात साहित्य का ठेवले म्हणून विचारणा केली तर पात्रांवास विचारा असे कामगार सांगतात. महापौर व उपमहापौर दोन दिवसांनी निवडले जाणार आहेत. त्यावेळी इतर समित्याही निवडल्या जातील. तत्पूर्वी मार्केटमध्ये शिस्त आणि स्वच्छता राखण्यावर सध्याचे चेअरमन काय पावले उचलतात हे पाहावे लागेल.