Panaji News : हल्याळच्या विकासासाठी प्रयत्न करेन - विश्वजीत राणे

रामनगर /पणजी : कर्नाटक सरकार आणि केंद्र सरकारच्या मदतीतून आपल्या मतदारसंघाचा सर्वांगीण विकास केला जाईल, यासाठी मी स्वतः प्रयत्न करेन, अशी ग्वाही गोव्याचे आरोग्यमंत्री विश्वजीत राणे यांनी आज हल्याळ जोयडा येथील मतदारांना दिली. हल्याळ, जोयडा मतदार संघातील भाजपचे उमेदवार सुनील हेगडे यांच्या प्रचारासाठी त्यांनी आज रामनगर परिसरात ठिकठिकाणी जाहीर सभा घेतल्या, त्यावेळी ते बोलत होते.

मंत्री राणे म्हणाले, रामनगर येथील जनता अनेक वर्षांपासून विकासापासून वंचित आहे. पंतप्रधान नरेंद्र मोदी यांच्या नेतृत्वाखाली अनेक विकासकामे मार्गी लागली आहेत. आरोग्याच्या पायाभूत सुविधा असो की, कनेक्टिव्हिटी, मोदी सरकारने ग्रामीण भागातील जीवनमान उंचावण्याला प्राधान्य दिले आहे.

सुनील हेगडे यांच्या सक्षम नेतृत्वाखाली उद्याचा काळ चांगला घडवण्याची वेळ आली आहे. यावेळी सुनील हेगडे यांचेही भाषण झाले. मंत्री राणे यांच्याकडे या परिसरातील सिरशी , कुमठा ,कारवार ,येल्लापूर , भटकळ या मतदारसंघाची अतिरिक्त जबाबदारी देण्यात आली असून हल्याळ जोयडा या मतदारसंघाची मुख्य जबाबदारी आहे.

परिवर्तनाची हिच वेळ !

परिवर्तनाची हीच वेळ आहे. सुनील हेगडेंना साथ देऊन खऱ्या अर्थाने विकास घडवून आणूया. सर्वांचा विकास हा मंत्र पंतप्रधान नरेंद्र मोदी यांनी अनुसरला. आणि त्याच पद्धतीने ते कार्यरत आहेत. हेगडे हे एक गतिमान नेते आहेत, ज्यांनी आपल्या लोकांसाठी अथकपणे काम केले आहे, पक्षाच्या सिद्धांताची अंमलबजावणी केली आहे,असेही राणे म्हणाले.