Panaji News: पर्वरी येथील घरात नरोत्तम सिंग धिलॉन ऊर्फ निम्स धिलॉन (७७) याचा खून करून दागिन्यांच्या चोरीप्रकरणी अटक करण्यात आलेल्या पूजा ऊर्फ नीतू रहुजा (२२) हिला पणजी अतिरिक्त सत्र न्यायालयाने सशर्त जामीन दिला. या गुन्ह्यात ती इतर संशयितांसोबत होती. मात्र, खून करण्यासाठी तिने त्यात भाग घेतलेला नाही. तिचा हा पहिल्याच गुन्हा असल्याने तिला जामीन देताना दया दाखवण्यात येत असल्याचे निरीक्षण सत्र न्यायालयाने केले आहे.
नरोत्तम धिलॉन या वृद्धाच्या खूनप्रकरणी पर्वरी पोलिसांनी जितेंद्र साहू (३२), पूजा ऊर्फ नीतू रहुजा (२२) व कुणाल खाटीक (२४, मध्यप्रदेश) यांना अटक केली होती. त्यांच्याविरुद्ध खून व चोरीच्या आरोपाखाली आरोपपत्रही दाखल केले आहे. याप्रकरणातील संशयित कुणाल खाटीक याला न्यायालयाने जामीन दिला आहे.
न्यायालयीन कोठडीतील संशयित पूजा रहुजा हिने जामिनासाठी अर्ज केला होता. न्यायालयाने तिला जामीन मंजूर करताना वैयक्तिक ५० हजार रुपयांचा जाचमुचलका व तत्सम रकमेचे दोन साक्षीदार सादर करण्यात यावेत. त्यातील एक साक्षीदार स्थानिक तर दुसरा तिचा नातेवाईक असावा. महिन्यातून एकदा तिने तपास अधिकाऱ्यांमसोर ठरवून दिलेल्या तारखेदिवशी पोलिसांत हजेरी लावावी, अशा अटी घातल्या.
संशयितांनी ३ फेब्रुवारी २०२४ च्या रात्री नरोत्तम धिलॉन याचा खून करून त्यांच्या घरातील मोबाईल आयफोन, सोन्याचे कडे, सोन्याची साखळी तसेच पांढऱ्या रंगाची गाडी घेऊन पलायन केले होते. पर्वरी पोलिसांनी या प्रकरणाचा छडा लावताना त्या तिघांना अटक केली होती व त्यांनी चोरलेला माल व गाडी जप्त केली होती. जितेंद्र व पूजा या दोघांना महाराष्ट्रातून अटक करण्यात आली होती. २ मे २०२४ रोजी आरोपपत्र दाखल केले आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.