Goa Agriculture: रोजगाराच्‍या नव्या संधी देणारं ‘पॅक हाऊस’ नक्की आहे काय?

भारतासह जगामध्ये कृषी क्षेत्रात साधनसुविधांबरोबरच व्यापारीकरणात मोठ्या प्रमाणात वाढ होत आहे. शेतीत नवनवे प्रयोग करण्यात येत आहे. त्‍यामुळे आधुनिक तंत्रज्ञान व नावीन्यपूर्ण उपक्रमांद्वारे आपला देश जगात कृषी क्षेत्रात अग्रेसर ठरण्‍याच्‍या दिशेने पावले टाकत आहे.

गोव्यातही शेतीच्‍या लागवडीसाठी सरकारकडून विविध उपक्रम राबविले जात आहेत. द्रोणाद्वारे शेती, बागायतीत प्रयोग सुरू आहेत. आता ‘पॅक हाऊस’ हा नवीन प्रयोग गोव्यातील कृषी उत्पादनाला जागतिक बाजारपेठ मिळवून देणारा ठरू शकतो.

आदर्श कृषी सोसायटी तसेच गोवा ॲग्रीकल्चर प्रोड्युस मार्केटिंग महासंघाचे अध्यक्ष प्रकाश वेळीप यांनी गोव्यात ‘पॅक हाऊस’ची संकल्पना साकार होणार असल्याचे सांगितले. हल्लीच त्यांच्या मार्गदर्शनाखाली कृषी संचालनालयातील अधिकाऱ्यांचा समावेश असलेल्या शिष्टमंडळाने वाशी-महाराष्ट्र येथील ‘पॅक हाऊस’ला भेट दिली होती.

आता हे ‘पॅक हाऊस’ मनोहर आंतरराष्‍ट्रीय विमानतळाच्या काही किलोमीटर अंतरावर स्थापन करण्याचा विचार आहे. सदर ‘पॅक हाऊस’चे काम यंत्रसामग्री किंवा स्वत:च्‍या हातानेही करता येण्यासारखे आहे. मात्र, हे पॅक हाऊस आमच्या सोसायटीतर्फे की कृषी खात्यातर्फे की गोवा ॲग्रीकल्चर प्रोड्युस महासंघातर्फे चालविले जाईल याचा निर्णय नंतर घेण्यात येईल, असेही वेळीप यांनी स्पष्ट केले.

पॅक हाऊस म्हणजे काय?

पॅक हाऊस म्हणजे एक केंद्र, जेथून शेतकऱ्यांकडून भाजी, फळे, शेती व बागायतीतील कच्ची उत्पादने घेतली जातात. नंतर ही उत्पादने प्रक्रियेद्वारे निर्यात करण्यासाठी तयार केली जातात. यात उत्पादने वेगवेगळी करणे, स्वच्छ करणे, ती काही काळासाठी विशिष्‍ट तापमानात ठेवणे, गरजेनुसार ती साठवून ठेवणे व नंतर मागणीनुसार इतर राज्यांमध्‍ये किंवा‍ देशांमध्ये निर्यात करता येतात.

शेतकऱ्यांना मिळेल चांगला बाजारभाव

गोव्यातील काजू, केळी, आंबे, नारळ, पपया, फणस या फळांबरोबरच सुपारी तसेच वांगी, भेंडी, मिरची, दुधी, मुळा किंवा इतर पालेभाज्या अन्‍य राज्‍यांत किंवा इतर देशांमध्ये निर्यात करणे शक्य आहे. त्यामुळे कृषी क्षेत्राची उत्पादन क्षमता वाढेल. शेतकऱ्यांना चांगला बाजारभाव मिळेल व अनेकांना रोजगाराच्या नवी संधी उपलब्ध होतील.