सटी देवीचे मंदिर वाचविण्यासाठी आमचा महामार्गाला विरोध; भोम-खोर्ली महामार्गाविषयी ग्रामस्थांचा आक्रमक पवित्रा

Boma-Khorlim National Highway: भोम-खोर्ली येथून जाणाऱ्या महामार्गाविषयी राज्य सरकार नागरिकांची फसवणूक करीत आहे. महामार्गासाठी एकाच बाजूने मोजणी करून सरकार काय सिद्ध करीत आहे. आम्ही सटी देवीचे आणि महादेवाचे मंदिर वाचविण्यासाठी महामार्गाला विरोध करीत आहोत, अशी माहिती भोमच्या ग्रामस्थांनी दिली.

आझाद मैदानावर शनिवारी झालेल्या पत्रकार परिषदेला संजय नाईक व इतर ग्रामस्थ उपस्थित होते. सार्वजनिक बांधकाम खात्याच्या मंत्र्यांनी ज्यांची घरे महामार्गात जाणार आहेत, त्यांना भाड्याच्या खोलीत ठेवण्यात येईल, असे सांगितले आहे. परंतु ज्यांचे पूर्वीपासून घर आहे, त्यांना हटविण्याचे कारण नाही.

याबाबत ग्रामस्थांचे असे म्हणणे आहे की, एकतर सरकारने एका बाजूनेच मोजणी केली आहे आणि तीही चुकीच्या पद्धतीने केली आहे. येथील लोकांचे सटी देवीचे आणि महादेवाचे मंदिर हे श्रद्धास्थान आहे. ही दोन्ही देवस्थाने राखण्यासाठीच आमचा प्रयत्न आहे. मागील 30 तारखेला महामार्गाचा डेमो दाखविण्यात आला, परंतु त्यावेळी उपस्थित अधिकाऱ्यांना विचारण्यात आलेल्या प्रश्‍नांची उत्तरे त्यांना देण्यात आली नाहीत,असे ग्रामस्थांचे मत आहे.