Goa Rain Update: आज जोरदार पावसाची शक्यता; ऑरेंज अलर्ट जारी

पणजी, ता. ६ (प्रतिनिधी) : राज्यात मागील काही दिवसांपासून मुसळधार बरसलेल्या पावसाने दोन दिवस काहीशी विश्रांती घेतली होती. मात्र, आज बुधवारी राज्यात जोरदार पाऊस पडण्याची शक्यता गोवा वेधशाळेद्वारे वर्तविण्यात आली असून ऑरेंज अलर्ट जारी करण्यात आला आहे.

गेल्या २४ तासांत राज्यात सरासरी केवळ १०.१ मिमी पावसाची नोंद करण्यात आली असून आतापर्यंत राज्यात एकूण ३२८९.५ मिमी म्हणजेच १२९.५० इंच पावसाची नोंद करण्यात आली आहे. राज्यात सरासरी पावसाच्या तुलनेत ५२.७ टक्के अधिक पावसाची नोंद झाली आहे.

गेल्या २४ तासांत सांगेत २२.८ मिमी, केपेत २० मिमी, काणकोणात १८.२ मिमी, साखळीत १४.८ मिमी, पेडणेत ११.४ मिमी, फोंड्यात १० मिमी, म्हापशात ८.२ मिमी, जुने गोवेत ७.४ मिमी, मडगावात ४.२ मिमी, मुरगावात १.४ मिमी, पणजीत १.१ मिमी, दाबोळीत ०.८ मिमी पावसाची नोंद करण्यात आली आहे.