CM Pramod Sawant: तब्बल 'एवढ्या' जणांना मिळणार शिकाऊ नोकऱ्यांची नियुक्तिपत्रे

CM Pramod Sawant येत्या १५ जुलै रोजी जागतिक कौशल्यदिनी राज्यातील 10 हजार जणांना सरकारी तसेच खासगी क्षेत्रात शिकाऊ नोकरीची नियुक्तिपत्रे दिली जाणार आहेत.

यासाठी सरकारी आणि खासगी क्षेत्रात शिकाऊ नोकरीची संधी शोधणाऱ्यांनी राष्ट्रीय पोर्टलवर नोंदणी करावी, असे आवाहन मुख्यमंत्री डॉ. प्रमोद सावंत यांनी केले आहे.

मुख्यमंत्री म्हणाले की, या राष्ट्रीय पोर्टलमधून मिळणारी माहिती राज्यात नोंदणीकृत कौशल्य संच उपलब्ध असलेल्या संधींशी जुळवले जातील आणि त्यांना संबंधित क्षेत्रात शिकाऊ उमेदवारी दिली जाईल.

पात्रतेच्या आधारे शिकाऊ व्यक्तीला दरमहा 8 ते 13 हजार रुपयांपर्यंतचे वेतन दिले जाईल. ही योजना चालू आहे आणि भविष्यातही सुरूच राहील.

राज्यात वाढती बेरोजगारी कमी करण्याबरोबरच कुशल प्रशिक्षित उमेदवार मिळावेत यासाठी ही अप्रेंटिसशिप योजना सरकारने लागू केली आहे. या योजनेतील प्रशिक्षित उमेदवारांना डॅशबोर्डनुसार नोंदणीकृत आस्थापनांची माहिती दिली जाईल.

याशिवाय आस्थापनांनाही उमेदवारांचा तपशील पाहता येईल. राज्यात सुरू करण्यात आलेल्या या महत्त्वाकांक्षी योजनेद्वारे शिकाऊ उमेदवारांना सुलभपणे नोकऱ्या उपलब्ध होऊ शकतील.