Olive Ridley Turtle: कासव आले खरे पण अंडी न घालताच माघारी परतले; विश्वजीत राणेंनी दिला गंभीर ईशारा

Olive Ridley Turtle: आश्वे मांद्रे येथील सागरी किनारी शुक्रवारी दुपारी दोनच्या दरम्यान एक सागरी कासव अंडी घालण्यासाठी किनाऱ्यावर आली होती. परंतु तिच्याजवळ पर्यटक आणि नागरिकांचा गोंधळ, मोठ्या आवाजामुळे अखेर सागरी कासव अंडी न घालताच समुद्रात माघारी फिरली. त्यामुळे पर्यावरण प्रेमी तर्फे नाराजी व्यक्त करण्यात येत आहे.

सागरी कासवांचं संवर्धन आणि संरक्षण करण्यासाठी वन्य विभागामार्फत 1999 ते आज पर्यंत मोरजी किनारी भागात कासव संवर्धन मोहीम राबवली जाते. त्याचाच एक भाग म्हणून हल्ली आश्वे मांद्रे किनाऱ्यावर मोठ्या प्रमाणात सागरी कासव येऊ लागले आहे. यापूर्वी दोन सागरी कासवांनी आश्वे येथे अंडी घातली तर मोरजी येथे एका सागरी कासवाने अंडी घातलेली आहेत.

शुक्रवार दिनांक 13 रोजी दुपारी दोनच्या दरम्यान आश्वे मांद्रे किनाऱ्यावर एक सागरी कासव अंडी घालण्यासाठी आली होती. वाळूमध्ये खड्डा खणत असताना काही पर्यटक आणि नागरिकांनी या ठिकाणी गोंधळाचे वातावरण तयार केल्याने सागरी कासवाने अंडी न घालता थेट माघारी समुद्रात परतली.

दरम्यान, वन मंत्री विश्वजित राणे यांनी ऑलिव्ह रिडले कासवाला त्रास दिल्याच्या या घटनेवर प्रतिक्रिया दिली आहे. या प्रकरणाची पाहणी करण्यासाठी वनविभागाची टीम पाठवण्यात आली असून त्यानुसार कार्यवाही सुरू केली जाईल असे त्यांनी सांगितले.