Goa Police: स्कूटरच्या बुकिंगचे आमिष; 300 हून अधिक ग्राहकांची फसवणूक, ठकसेनला गोव्यात अटक

सुझुकी स्कूटरच्या बुकिंगचे आमिष दाखवून तामिळनाडूतील सुमारे 300 हून अधिक ग्राहकांकडून 40 लाखांची रक्कम घेऊन पसार झालेल्या संशयित ए. राजेश याला आज जुने गोवे पोलिसांच्या मदतीने तामिळनाडू पोलिसांनी खोर्ली -जुने गोवे येथून अटक केली. तो जुने गोवे येथे राहत असलेल्या ठिकाणाहून 10 दुचाकी तसेच गोवा व कर्नाटकच्या बनावट क्रमांकपट्ट्या जप्त करण्यात आल्या आहेत.

तामिळनाडू येथील कुनाईमुत्तूर पोलिस स्थानकात संशयित ए. राजेश याच्याविरुद्ध फसवणुकीच्या तक्रारी दाखल झाल्या आहेत. त्याने सुझुकी स्कूटरचे बुकिंगसाठी आमिष दाखवून काही लोकांकडून आगाऊ रक्कम घेतली होती.

ज्यांनी बुकिंग केली होती त्यांना स्कूटर न मिळाल्याने तसेच ए. राजेश गायब झाल्याने पोलिस तक्रारी नोंदवण्यात आल्या होत्या. कुनाईमुत्तूर पोलिसांनी त्याचा शोध घेण्याचा प्रयत्न केला मात्र तो सापडत नव्हता.

संशयिताने गोव्यात आसरा घेतला असल्याची माहिती कुनाईमूत्तूर पोलिसांना मिळाल्यावर त्यांनी येथील पोलिसांशी संपर्क साधला. तो जुने गोवे परिसरात राहत असल्याचे कुनाईमुत्तूर पोलिसांना ठोस माहिती मिळाल्याने त्याचा शोध घेण्यासाठी तीन पोलिस पथके तयार करण्यात आली.

या पथकाने खोर्ली, जुने गोवे, दोनापावल व करंझाळे येथे त्याचा शोध घेतला. अखेर तो खोर्ली येथे राहत असलेल्या ठिकाणी सापडला. त्याला ताब्यात घेऊन ट्रान्स्फर वॉरंटवर तामिळनाडू पोलिस गोव्यातून रवाना झाले.