तवडकरांच्या भेटीनंतर केंद्रीय मंत्री गडकरींनी करमलघाट रस्त्याच्या पहाणीसाठी धाडले OSD

OSD inspected Karmlaghat In Canacona: करमलघाटातील धोकादायक वळणावर रस्ता केंद्रीय मंत्री नितीन गडकरी यांनी त्यांचे ओएसडीना (officer on special duty) पाठवून करमलघाट रस्त्याची पहाणी केली.

यावेळी ओएसडी अमोल बिरासदार पाटील, सभापती रमेश तवडकर यांच्यासह नगराध्यक्ष रमाकांत नाईक गावकर, महामार्ग विभागाचे सहाय्यक अभियंता सागर शेट, निवृत्त सहाय्यक अभियंता सुभाष पागी, सभापतीचे निजी सचिव राजेंद्र बोरकर, श्रीस्थळ पंचायतीचे माजी सरपंच गणेश वेळीप, पंच अक्षदा वेळीप, निलेश गावकर, शंभा नाईक देसाई, सम्राट भगत उपस्थित होते.

'मडगाव- कारवार हमरस्त्याचा करमलघाट ते गुळे हा टापू दिवसेंदिवस धोकादायक बनत चालला आहे ही बाब केंद्रीय मंत्री नितीन गडकरी यांच्या निदर्शनास आणून दिली होती. करमलघाटात धोकादायक वळणावर रस्ता रूंदीकरणासाठी केंद्रीय वाहतूक व राष्ट्रीय महामार्ग मंत्री नितीन गडकरी यांनी अतिरिक्त पाच कोटी रूपये देण्याचे मान्य केले आहेत.' असे सभापती रमेश तवडकर यांनी माहिती देताना सांगितले.

'चारपदरी रस्त्यासाठी लागणाऱ्या जमिनीसाठी भूसंपादन प्रक्रिया ही लांबणारी प्रक्रिया आहे हे वास्तव लक्षात घेऊन तातडीने धोकादायक वळणे कापून त्याजागी रस्ता रुंदीकरण करण्यावर लक्ष केंद्रित करण्यासाठी दिल्लीत जाऊन केंद्रीय मंत्र्याची भेट घेतली.

त्यांना वस्तू स्थिती समजावून सांगितली आहे या ठिकाणी आठवड्यातून किमान तीन अपघात घडत असतात हे निदर्शनास आणून दिल्यानंतर गडकरी यांनी त्वरीत रस्ता रुंदीकरण करण्यासाठी तातडीने पाच कोटी रूपये मंजूर केले आहेत.' असे तवडकर म्हणाले.

यापूर्वी हमरस्त्यावरील अर्धफोंड येथील तळपण नदीवरील पूलाची दुरूस्ती व बाबरे पूल उभारणी करून राहिलेल्या अतिरिक्त निधीतून रस्ता रुंदीकरण करण्याचा प्रस्ताव होता मात्र हा निधी तुटपुंजा असल्याने नव्याने प्रस्ताव तयार करून रस्ता वाहतूक व राष्ट्रीय महामार्ग मंत्रालयाला सादर करण्यात आला आहे.

त्या प्रस्तावाचा पाठपुरावा करण्यात येत त्याचाच भाग म्हणून केंद्रीय मंत्री नितीन गडकरी यांनी आपले ओएसडी यांना काणकोणात पाठवून परिस्थिती समजून घेतली आहे. त्यामुळे पावसाळ्यापूर्वी रस्ता रुंदीकरण कामाला प्रारंभ होईल अशी अपेक्षा सभापती तवडकर यांनी व्यक्त केली.