North Goa Zilla Panchayat: ...तेव्हा राजीनाम्याचे ठरलेच नव्हते; सिद्धेश नाईक

पणजी: उत्तर गोवा जिल्हा पंचायत अध्यक्ष म्हणून जबाबदारी देताना पक्षाने अडीच वर्षांत राजीनामा देण्याची कुठलीही कल्पना मला दिली नव्हती. नुकत्याच झालेल्या भाजप पक्षाच्या कोअर समितीच्या बैठकीत मी राजीनामा द्यावा आणि नवीन अध्यक्षांना संधी द्यावी असा निर्णय घेण्यात आला. मी पक्षाचा प्रामाणिक कार्यकर्ता असल्याने पक्षाचा कुठलाही निर्णय मान्य करून पक्षासोबत राहण्याचे माझे कर्तव्य मानून राजीनामा दिल्याचे जिल्हा पंचायत अध्यक्ष सिद्धेश नाईक यांनी सांगितले.

सिद्धेश नाईक यांच्यासोबत यावेळी पत्रकार परिषदेत जिल्हा पंचायत सदस्य शंकर चोडणकर, संदीप बांदोडकर, निहारिका मांद्रेकर, मनीषा नाईक, दत्तप्रसाद दाभोळकर, अंजली नाईक उपस्थित होत्या. माझ्याकडे अनुभव आहे, नवीन अध्यक्षांना मी पाठिंबा देईन आणि सर्वते सहकार्य करीन, असे सिद्धेश नाईक यांनी स्पष्ट केले.

वित्त आयोगाकडून येणाऱ्या निधीचा वापर हरित कामांसाठी करण्यात यावा असा संकल्प यावर्षी घेण्यात आला होता. त्यानुसार विविध कामे हाती घेण्यात आली. मी माझ्या मतदारसंघात दिवार बेटावर सौर ऊर्जेवरील सीसीटीव्ही कॅमेरा उभारले. पर्यटक या बेटावर येत असतात आणि अनेकजण खुल्या जागेत कचरा फेकत होते. कॅमेरे लावल्याने खुल्या जागेत कचरा फेकण्याचे प्रमाण कमी झाल्याची माहिती नाईक यांनी दिली.

म्हापशात जिल्हा भवन उभारणार

उत्तर गोव्यात जिल्हा भवन बांधण्यासाठी अनेकांनी प्रयत्न केले, परंतु मुख्यमंत्री आणि पंचायतमंत्री मॉविन गुदिन्हो यांच्या सहकार्याने करासवाडा - म्हापसा येथे जमीन निश्चित झाली आहे. क्रीडा खात्याची ही जमीन हस्तांतरित करण्यासाठी आम्ही मागणी केली आहे आणि त्यासंदर्भात मुख्य सचिवांशी बैठकही घेतली आहे. कायदेशीर प्रक्रिया सुरू असून लवकरच आम्हाला ही जमीन मिळणार आहे, अशी माहिती नाईक यांनी दिली.

अडीच वर्षांत ३० कोटींची कामे

सिद्धेश नाईक यांनी आपल्या कार्यकाळात झालेल्या कामांची उजळणी करताना सांगितले, की अडीच वर्षांत आम्ही ३० कोटी रुपयांची कामे केली. अनुसूचित जाती आणि अनुसूचित जमातीसाठी येणाऱ्या निधीतून ३ कोटी ५७ लाख रुपयांची कामे करण्यात आली. साहित्य पुरवठ्याच्या माध्यमातून २०२२ ते २०२३ या वर्षात १.७८ कोटी रुपये, तर २०२३-२४ वर्षात ५.२६ कोटी रुपयांचे साहित्य पुरविण्यात आले.