Goa: सार्वजनिक बांधकाममंत्री नीलेश काब्राल यांनी सोमवारी (ता.2) सकाळी चांदर-कुडतरी पुलाची पाहणी केली. हा पूल जानेवारीच्या अखेरीस वाहतुकीसाठी खुला केला जाईल, असे मंत्र्यांनी सांगितले. पूल वाहतुकीस खुला करण्यापूर्वी पुलासाठी जी जागा संपादित केली आहे त्या ठिकाणी केलेले अतिक्रमण हटवून ती जागा मोकळी केली जाईल, असेही मंत्र्यांनी स्पष्टपणे सांगितले.
पुलाजवळील जागा जी पुलावर जाण्यासाठी रस्ता करण्यास संपादित केली होती तिचा पूर्णपणे खात्याने उपयोग केलेला नाही. हा पूल गेल्या वर्षी जानेवारी 2022 मध्ये वाहतुकीस खुला करण्यास येईल, असे जाहीर करण्यात आले होते.
नंतर उद्‌घाटन सोहळा मे 2022 पर्यंत पुढे ढकलण्यात आला होता. हा पूल वाहतुकीस खुला झाल्यावर मडगावहून चांदरला जायला अवघी 20 मिनिटे लागतील, असा अंदाज व्यक्त करण्यात येत आहे.
हा पूल जेव्हा प्रस्तावित केला होता तेव्हा चांदर व गिरदोलीच्या नागरिकांनी त्यास कडाडून विरोध केला होता. पूल रेल्वे ट्रॅकच्या दुपदरीकरणासाठी बांधण्यात येत आहे, अशी नागरिकांना भीती होती. तसेच हा पूल 12 ऐवजी केवळ 6 मीटर रुंदीचा असावा, अशीही त्यांची मागणी होती. या पुलाचे बांधकाम केंद्र व राज्य सरकारतर्फे तसेच दक्षिण-पश्र्चिम रेल्वेतर्फे करण्यात आले आहे.
या पुलावरील रस्त्याचे हॉटमिक्सिंग अजून केलेले नाही. हे काम एप्रिल-मे महिन्यात केले जाईल; पण सर्व प्रकारची सावधानता बाळगून पूल वाहतुकीस खुला केला जाईल.- नीलेश काब्राल, सार्वजनिक बांधकाममंत्री
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
