Goa Railway: 'नेवरा'त नवीन रेल्वे स्टेशन झाल्यास चोऱ्यांचे प्रमाण वाढेल, स्थानिकांना सतावतेय भीती; काय आहे तर्क जाणून घ्या

Locals Oppose Neura Railway Station

तिसवाडी: नेवरा, सारझोरा आणि मये येथे नवीन रेल्वेस्थानक बांधण्याची घोषणा कोकण रेल्वेकडून केल्यानंतर मुख्यमंत्री डॉ. प्रमोद सावंत यांनी अभिनंदन केले; परंतु ही घोषणा झाल्यानंतर नेवरा आणि सभोवतीच्या डोंगरी, आजोशी, पिलार आणि आगशी गावांतून तीव्र नाराजी व्यक्त केली जात आहे. यापूर्वी रेल्वेस्थानकाला विरोध केला होता आणि आतादेखील विरोध करणार असल्याचा पवित्रा नेवरावासीयांनी घेतला आहे.

राज्यातील प्रमुख रेल्वेस्थानकांपैकी एक करमळी रेल्वेस्थानक हे अवघ्या सहा किलोमीटर अंतरावर असल्याने नेवरा येथील स्थानकाचा कोणाला लाभ होईल. पणजी सुमारे १८ किलोमीटर, दाबोळी विमानतळ १८ किलोमीटर, मडगाव २० किलोमीटर असल्याने सहजरीत्या जाण्यासाठी पर्याय उपलब्ध आहे.

त्यात नेवरा गाव हा पिलार आणि जुने गोवे यांच्यादरम्यान असल्याने येथे उतरल्यास पणजी किंवा मडगाव येथे जाणे लांब पडणार आहे. त्यामुळे सरकारने आणि कोकण रेल्वे यांनी प्रथम हे रेल्वेस्थानक कशासाठी आणले जात आहे, हे स्पष्ट करावे, अशी मागणी होत आहे.

नेवरा आणि सभोवतीच्या परिसरात चोऱ्यांचे प्रमाण पूर्वीच वाढले असून त्यात रेल्वेस्थानक येथे आल्यास चोरट्यांना थेट येथे उतरण्याची सोय मिळणार आहे. त्यामुळे येथे रेल्वेस्थानक येता कामा नये, अशा प्रतिक्रिया ऐकू येऊ लागल्या आहेत.