Netravali Wildlife Sanctuary: 7 किमीसाठी कापावे लागणार तब्‍बल 70 किलोमीटरचे अंतर

नेत्रावळी अभयारण्य क्षेत्रात येणाऱ्या धारगिणी, भाटी-सांगे येथील जुना गावात जाणाऱ्या रस्त्यावर वन खात्याने दोन फाटके बसविल्याने नागरिकांना अडचणींना तोंड द्यावे लागत आहे.

आता तर चारचाकी वाहनचालकांनाही प्रवेश नाकारला जात असल्यामुळे मोठी समस्‍या उभी ठाकली आहे. सात किलोमीटर अंतर तब्‍बल सत्तर किलोमीटर एवढे कापावे लागणार आहे.

धारगिणी-भाटी येथील अभयारण्य क्षेत्रात राज्‍यातील शेवटचा जुना गाव आहे. त्यापुढे कर्नाटकची सीमा सुरू होते. डिग्गी जोयडा येथील श्री गवळादेवीची जत्रा ही फार प्रसिद्ध आहे.

याच रस्त्यावरून हजारो भाविक शेकडो वाहने घेऊन या जत्रेसाठी जात असतात. पण आता जुना गावात जाण्यासाठी चारचाकी वाहनावर निर्बंध घालण्यात आल्याने लोकांना मन:स्‍ताप सहन करावा लागत आहे.

याच मार्गांवर दोन फाटके बसविण्यात आली आहेत. एक मुख्य रस्त्यावर आणि एक मुख्य रस्त्यापासून तीन किलोमीटर अंतरावर.

आता जर कोणाला जुनामार्गे गवळादेवीच्या दर्शनाला जायचे असेल तर आपली वाहने पहिल्या फाटकावर थांबवून तीन किलोमीटर अंतर चालत दुसऱ्या फाटकावर असलेल्या वन खात्याच्या कर्मचाऱ्यांकडून परवानगी घ्यावी लागते.

आणि परवानगी मिळाली नाही तर पुन्‍हा चालत माघारी यावे लागते. त्यामुळे दोन्ही फाटकांवर कर्मचारी असणे आवश्यक आहे.

मानवता श्रेष्‍ठ की वन्‍य कायदा?

अचानक एखाद्या रुग्‍णाला इस्‍पितळात न्‍यावे लागले तर चारचाकी घेऊन जुना, डिग्गी, बाजारकुणग, केसरलॉक, अनमोड, मोले, कुळेमार्गे कुडचडे असा प्रवास करावा लागेल.

याचाच अर्थ जुना ते सांगे अवघे सात किलोमीटरचे अंतर वन खात्याच्या निर्णयामुळे तब्‍बल सत्तर किलोमीटर कापावे लागणार आहे. हे मानवतेच्या दृष्टीने योग्य की वन्‍य कायदा योग्य? हे तपासून पाहण्याची वेळ आली आहे.