Goa Election: राष्ट्रवादी काँग्रेसला आठ जागांची अपेक्षा

मडगाव: गोव्यात (Goa) आगामी निवडणुकीत (Election) काँग्रेस (Congress) आणि राष्ट्रवादी या पक्षात युती होणार असून राष्ट्रवादी पक्षाला काँग्रेसने किमान आठ जागा सोडाव्यात अशी अपेक्षा राष्ट्रवादीचे बाणावलीचे आमदार चर्चिल आलेमाव यांनी व्यक्त केली.

राष्ट्रवादीचे नेते प्रफुल्ल पटेल हे सध्या गोव्यात आले आहेत. त्या पार्श्वभूमीवर आलेमाव यांनी ही माहिती दिली. काँग्रेस आणि राष्ट्रवादीचे नेते एकमेकांना भेटले असून त्यांनी युती करण्यास मान्यता दिल्याचे त्यांनी सांगितले. नावेली मतदार संघातून यावेळी आपली कन्या वालांका आलेमाव या निवडणूक लढविणार असल्याचे संकेतही त्यांनी दिले.

नावेलीची जागा काँग्रेसला गेल्यास वालांका काँग्रेसच्या उमेदवारीवर निवडणूक लढविणार असे सांगितले. युती झाली नाही तरी गोव्यात निवडणूक लढविण्याची सर्व तयारी राष्ट्रवादी काँग्रेसने केली असून युती न झाल्यास जास्तीत जास्त जागांवर उमेदवार उतरविण्याची पक्षाची तयारी आहे असे त्यांनी सांगितले