'त्या' विवाहित महिलेचा खूनच! पतीवर संशय

मडगाव: मडगावमध्ये (Margao) एका विवाहितेचा मृत्यू झाल्याची घटना घडली होती. बाळंतपणात अशक्त झाल्यामुळे बाळाचे कपडे धुण्यासाठी विवाहिता बाथरुममध्ये गेली. त्यावेळी तोल जाऊन जिन्यावरून खाली कोसळून तिचा मृत्यू झाला असे पतीने सांगितले होते. मात्र, तो फक्त बनाव असल्याचे स्पष्ट झाले आहे. महिलेच्या अंगावर चाव्यांचे व्रण सापडल्याने तिला मारहाण केल्यामुळेच मृत्यू झाल्याचे शवविच्छेदन अहवालातून स्पष्ट झाले आहे.

या प्रकरणात तपास करणारे उपजिल्हाधिकारी प्रसाद वळवईकर यांनी या प्रकरणी मडगाव पोलिसात बुधवारी रात्री उशिरा तक्रार दिली. मडगाव पोलिसात खुनाचा गुन्हा दाखल करण्याची प्रक्रिया सुरू होती. या प्रकरणी महिलेचा पती सागर तिंबाडिया याच्यावर संशय व्यक्त केला जात आहे.

ही घटना 10 डिसेंबर रोजी रात्री 11 च्या सुमारास घडली होती. अंकिता तिंबाडिया (29) असे मृतेचे नाव आहे. पत्नीला बाळंतपणानंतर चिकनगुनियाची बाधा झाल्याने ती अशक्त होती. त्या रात्री तिला उलट्या सुरू झाल्या. त्याच अवस्थेत ती बाळाचे कपडे धुण्यासाठी बाथरुमात गेली. त्यावेळी आपण बाळाला भरवत होतो. काही वेळाने आपण बाथरुमात गेलो तेव्हा ती आपल्याला बेशुद्ध अवस्थेत सापडली असे तिचा पती सागर याने पोलिसांना सांगितले होते.