Mungul Crime: मुंगूल गँगवॉरप्रकरणी नवी अपडेट! अन्य 11 संशयितांचा जामिनासाठी अर्ज; नायायालयात होणार सुनावणी

मडगाव: मुंगूल गँगवॉर प्रकरणी अन्य अकरा संशयितांनी जामिनासाठी दक्षिण गोवा सत्र न्यायालयात अर्ज केला असून, त्यावर मंगळवारी (ता.२३) सुनावणी होणार आहे.

अमोघ नाईक, मोहम्मद ताहिर खान, विल्सन कार्व्हालो, मालिक शेख , मंदार प्रभू, सूरज बोरकर, ओमप्रकाश मेघवाल, प्रकाश कारबार, सूरज मांझी, शाहरुख शेख व इम्रान बेपारी अशी अर्ज केलेल्यांची नावे आहेत.

गेल्या आठवड्यात न्यायालयाने याच गँगवॉर प्रकरणी व्हॅली डिकॉस्टा, अमर कुलाल, वासु कुमार, मोहन अली, ज्योयस्टन फर्नांडिस, सुनील बिलावर, बाशा शेख, गौरांग कोरगावकर, राजेश वेल्मा, प्रकाश वेल्मा, अविनाश गुंजीकर, धनंजय तलवार, अक्षय तलवार या १३ जणांना सशर्त जामीन मंजूर केला होता. तसेच दिपक कट्टीमणी व परशुराम राठोड या दोघांना पूर्वीच जामीन मंजूर झाला होता.

मुंगुल येथे १२ ऑगस्टला गँगवॉरची घटना घडली होती. एकूण २८ जणांना फातोर्डा पोलिसांनी अटक केली होती. त्यातील व्हॅली व वोल्टर यांच्या गँगच्या संघर्षातून हे टोळीयुद्ध झाले होते. यात युवकेश सिंग व रफिक तैशान हे दोघे गंभीर जखमी झाले होते. कुख्यात गँगस्टर लॉरेन्स बिष्णोई याचा या  गँगवॉर प्रकरणी सहभाग असल्याचे तपासात आढळून आल्याने या घटनेचे गूढ वाढले होते.