Mumbai Goa Vande Bharat Train: मुंबई गोवा मार्गावर सेमी हायस्पीड वंदे भारत ट्रेन सुरू करण्याचा मोठा निर्णय केंद्राच्या वतीने घेण्यात आला. तीन जून रोजी उद्धाटन करून 05 जूनपासून वंदे भारत ट्रेन मुंबई गोवा मार्गावर नियमित धावणार अशी घोषणा केली.
मात्र, उद्धाटन होण्यापूर्वी ओडिसा येथे भीषण ट्रेन अपघात झाल्याने वंदे भारत ट्रेनचे उद्धाटन पुढे ढकलण्यात आले. अखेर वीस दिवस उलटल्यानंतर आता 27 जून रोजी या ट्रेनला हिरवा झेंडा दाखवला जाणार आहे. मात्र, आगामी मान्सूनच्या पार्श्वभूमीवर या ट्रेनच्या वेळापत्रकात बदल करण्यात आला आहे.
छत्रपती शिवाजी महाराज टर्मिनस मुंबई ते मडगाव दरम्यान धावणाऱ्या सेमी हायस्पीड वंदे भारत ट्रेनला मंगळवारी (दि.27) पंतप्रधान नरेंद्र मोदी हिरवा झेंडा दाखवतील. पूर्वी आठवड्यातून सहा दिवस धावणार असे जाहीर केलेल्या या ट्रेनच्या वेळापत्रकात ऐन पावसाळ्यात बदल करण्यात आला आहे.
वंदे भारत ट्रेन आता आठवड्यातून केवळ तीनच दिवस धावणार आहे. मान्सूनमुळे कोकण रेल्वे मार्गावर वेग मार्यादा लागू करण्यात आल्याने ट्रेनच्या वेळापत्रकात बदल करण्यात आल्याची माहिती समोर आली आहे. दरम्यान, 7.50 तासांत पूर्ण होणारा हा प्रवास मान्सून काळात पूर्ण व्हायला दहा तास लागतील.
असे आहे सुधारीत वेळापत्रक (Mumbai Goa Vande Bharat Train Timetable)
मुंबई गोवा वंदे भारत ट्रेन सोमवार, बुधवार आणि शुक्रवारी मुंबई येथून सकाळी 5.32 वा. सुटेल आणि दुपारी 3.30 वा. गोव्यातील मडगाव रेल्वे स्थानकावर दाखल होईल. म्हणजे तब्बल दहा तासांनंतर ट्रेन गोव्यात येईल.
तर, गोव्यातून या ट्रेनचा परतीचा प्रवास दुसऱ्या दिवशी सुरू होईल. म्हणजेच, मंगळवार, गुरूवार आणि शनिवारी मडगाव येथून 12.20 वा. वंदे भारत ट्रेन सुटेल आणि मुंबई येथे रात्री 10.20 वा. पोहोचेल.
सध्या मुंबई गोवा रेल्वे मार्गावर तेजस ही सर्वात वेगवान ट्रेन धावते, तेजस 586 कि.मी अंतर आठ तास आणि 50 मि. पूर्ण करते.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.