मुंबई - गोवा महामार्गावर पेडणे येथे पुन्हा दरड कोसळल्याने दोन्ही लेनवरील वाहतूक ठप्प झाली आहे. मालपे न्हयबाग येथे रस्ता कडेला संरक्षक भिंतीवरील तांबड्या मातीचा भराव रस्त्यावर आल्याने महामर्गावरील वाहतूक बंद झालीय. पंधरा दिवसात त्याच भागात दुसऱ्यांदा दरड कोसळण्याची घटना घडलीय.
दुपारी बाराच्या सुमारास ही घटना समोर आली. गेल्या दोन दिवासांपासून राज्यात पावसाची संततधार सुरु आहे. राज्यात अनेक पडझडीच्या घटना घडत असताना मालपे येथे राष्ट्रीय महामार्गावर दरड कोसळण्याचा प्रकार समोर आला.
तांबड्या मातीच्या ढीगाऱ्यासह जांभे दगड देखील महामार्गावर आल्याने मार्गावरील दोन्ही लेन वाहतुकीसाठी बंद झाल्या आहेत. गेल्या महिन्यात २२ जून रोजी अशाच प्रकारे दरड कोसळून मोठा दगड महामार्गावर आल्याने सिंधुदुर्गकडे जाणारी वाहतूक ठप्प झाली होती. पंधरा दिवसांच्या कालावधीत त्याच ठिकाणी पुन्हा दरड कोसळण्याची घटना घडल्याने विरोधी पक्षातील नेते आक्रमक झाले आहेत.
कंत्राटदाराला अटक करुन काळ्या यादीत टाका
पेडण्यात राष्ट्रीय महामार्ग -६६ वर पुन्हा दरड कोसळण्याची घटना घडली. भाजपचा जावई असलेली एमव्हीआर इन्फ्रा कंपनी केंद्रीय रस्ते आणि महामार्ग मंत्री नितीन गडकरींना पेडण्यात येण्यापासून रोखण्याचा प्रयत्न करतायेत. मुख्यमंत्री प्रमोद सावंत यांनी कंत्राटदाराला अटक करुन काळ्यात यादी टाकावे अशी मागणी काँग्रेस प्रदेशाध्य अमित पाटकर यांनी केली आहे.
जुन्या मार्गावरून वाहतूक सुरु
काही महिन्यापूर्वी हा मार्ग वाहतुकीसाठी खुला करण्यात आला होता. पण गेल्या पंधरा दिवसांत घडलेल्या दोन घटनानंतर या मार्गावरील वाहतूक जुन्या मार्गावरुन सुरु ठेवण्यात आली आहे. सततच्या पावसामुळे सैल झालेले मातीचे ढीगारे आणि निकृष्ट दर्जाची संरक्षक भिंतीचे काम यामुळे दरड कोसळून मार्गावर येत आहे. यामुळे वाहतुकीला फटका बसत आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.