Mulgao Mining Issue: '..तर जिल्हा पंचायत निवडणुकीवर बहिष्कार'! मुळगाववासीयांचा इशारा; खाणीच्या विळख्यातून मुक्त करण्याची केली मागणी

डिचोली : ‘खाण’ प्रश्नी मुळगाववासीय आपल्या भूमिकेशी ठाम आहेत. गावचे प्रश्न सोडवून गावाला खाणीच्या विळख्यातून मुक्त करा. गावच्या अस्तित्वासाठी वेळप्रसंगी आम्ही जिल्हा पंचायत निवडणुकीच्या मतदानावर बहिष्कार घालण्यासही मागे राहणार नाही, असा इशारा ग्रामस्थांनी दिला. ‘खाणी’ ला आमचा विरोध नाही. मात्र गाव सांभाळा, अशी भूमिका मुळगाववासियांची आहे.

मुळगाव पंचायतीच्या गेल्या ग्रामसभेत ठरल्याप्रमाणे आज मुळगाववासियांची बैठक झाली. मानसबाग-मुळगावच्या श्री धाईम देवाच्या मदिरात झालेल्या या बैठकीस सरपंच मानसी कवठणकर, उपसरपंच गजानन मांद्रेकर यांच्यासह अन्य पंचसदस्य तसेच देवस्थान, कोमुनिदाद, शेतकरी आदी ग्रामसंस्थांचे प्रतिनिधी मिळून जवळपास शंभर ग्रामस्थ उपस्थित होते.

यात महिलांची संख्या लक्षणीय होती. घरे, मंदिरे आदी नैसर्गिक संपत्ती खाण लीज क्षेत्रातूनबाहेर काढा. ‘बफर झोन’ प्रमाणे खाण सुरु करा. खाणीवरील रात्रपाळीचे काम बंद करा. ही मुळगावच्या ग्रामस्थांची मुख्य मागणी आहे.

गावचे प्रश्न सोडवण्यास खाण कंपनी पूर्णपणे अपयशी ठरली आहे. उलट, खनिज व्यवसाय बेधडकपणे सुरु आहे. यासंबंधी स्थानिक पंचायतीने पुन्हा एकदा पत्रव्यवहार करून आठ दिवसांची मुदत द्यावी. अन्यथा ग्रामस्थ खाणीवर धडक देतील, असा निर्णय यावेळी घेण्यात आला.

गावचे प्रश्न सोडवण्यास कंपनी व्यवस्थापन आणि सरकार अपयशी ठरत आहे. त्यामुळे आता जिल्हा पंचायत निवडणुकीवर बहिष्कार घातल्याशिवाय पर्याय राहणार नाही, असे कोमुनिदादचे अध्यक्ष महेशश्वर परब, सरपंच मानसी कवठणकर आणि पंचसदस्य तृप्ती गाड यांनी स्पष्ट केले. या बैठकीत जैवविविधता समितीचे स्वप्नेश शेर्लेकर, शेतकरी संघटनेचे प्रकाश परब, गजानन मांद्रेकर, केशव परब, पुतूलो आदींनी विचार मांडले.