Mulgao: "खाणीला आमचा विरोध नाही, पण बफर झोनप्रमाणे खाण सुरू करा" मुळगावासीयांची मागणी

डिचोली: मुळगाव पंचायतीच्या आज (२० एप्रिल) झालेल्या ग्रामसभेत पुन्हा एकदा खाणीच्या विषयावर चर्चा झाली. खाणीला आमचा विरोध नाही. मात्र प्रादेशिक आराखडा-२०२१ मध्ये निश्चित केलेल्या बफर झोनप्रमाणे खाण व्यवसाय सुरू करावा.

त्याचबरोबर रात्रपाळीविषयी गंभीरपणे फेरविचार करावा, अशी मागणी ग्रामस्थांनी केली तसेच तसा ठरावही घेतला. ग्रामस्थ्यांच्यावतीने माजी सरपंच वसंत गाड यांनी हा ठराव मांडला.

त्याला उपस्थित ग्रामस्थांनी मान्यता दिली. संबंधितांकडे पुन्हा पत्रव्यवहार करावा, अशी मागणीही करण्यात आली. सरपंच मानसी कवठणकर यांच्या अध्यक्षतेखाली https://dainikgomantak.esakal.com/topic/sarpanchपंचायतीची ग्रामसभा झाली.

पंचायतीचे सचिव पुंडलिक गावस यांनी मागील ग्रामसभेचे इतिवृत्त सादर केले. या ग्रामसभेस उपसरपंच गजानन मांद्कर रे यांच्यासह विशालसेन गाड, सुहासिनी गोवेकर आणि कलशावकर हे पाच पंचसदस्य हजर होते. तर तृप्ती गाड आणि मधुकर हळर्णकर हे दोन पंचसदस्य गैरहजर होते.