Goa Viva Carnival 2025: शनिवारपासून गोव्यात 'किंग मोमो'ची राजवट; सुरु होणार कार्निव्हलचा जल्लोष

Goa Viva Carnival 2025

पणजी: गोवा कार्निव्हल २०२५ रंगतदार उत्सव संगीत आणि जल्लोषाने प्रकाशमान होण्यासाठी सज्ज झाला आहे. गोवा पर्यटन विभागाने क्लिवेन मॅथ्यू फर्नांडिस यांची 'किंग मोमो' म्हणून निवड केली आहे.

पर्वरीतील कार्निव्हल रद्द झाल्याने यावर्षी १ मार्च रोजी पणजीतून सुरुवात होणार असून २ मार्च रोजी मडगाव, ३ मार्च रोजी वास्को आणि ४ मार्च रोजी मोरजी व म्हापसा येथे कार्निव्हलच्या मिरवणूक काढण्यात येणार आहेत. गोवा पर्यटन विकास महामंडळाचे व्यवस्थापकीय संचालक कुलदीप आरोलकर यांनी आयोजित पत्रकार परिषदेत ही माहिती दिली.

यावेळी 'किंग मोमो' क्लीवेन मॅथ्यू फर्नांडिस आणि जीटीडीसीचे उपमहाव्यवस्थापक दीपक नार्वेकर देखील उपस्थित होते. या कार्यक्रमात कार्निव्हलचे अधिकृत गाणेही लाँच करण्यात आले. या भव्य सोहळ्यात रंगीत फ्लोट परेड, उत्साही संगीत, आकर्षक सांस्कृतिक सादरीकरणे आणि गोव्याच्या अनोख्या परंपरांचे दर्शन घडवणाऱ्या कार्यक्रमांचे आयोजन करण्यात आले आहे. हजारो पर्यटक आणि स्थानिक नागरिक या आनंदोत्सवात सहभागी होणार आहेत असे आरोलकर यांनी सांगितले.

पणजीत मार्ग तोच

पर्यटन विभागाचे व्यवस्थापकीय संचालक कुलदीप आरोलकर यांनी सांगितले की, पणजीतील कार्निव्हल मिरवणुकीसाठी मागील मार्गच राहील, मात्र एम. जी. रोडवर वाहतूक वळविण्यात येणार आहेत. पोलिसांनी या संदर्भात आपली स्वतंत्र योजना आखली आहे. तसेच, स्मार्ट सिटी अधिकाऱ्यांशी चर्चा झाली असून, त्यांनी सर्व कामे पूर्ण होणार असल्याचे स्पष्ट केले आहे. त्यामुळे कोणत्याही अडचणी येणार नाहीत.

सर्वधर्मीयांनी एकत्र यावे

किंग मोमो क्लिवेन मॅथ्यू फर्नाडिस यांनी या सोहळ्याचे स्वागत करत हिंदू, मुस्लिम आणि ख्रिश्चन या सर्व धर्मीयांनी कार्निव्हलला उपस्थित राहून आनंद घ्यावा, असे आवाहन केले आहे. गोवा पर्यटन विभागाने या प्रतिष्ठेच्या सोहळ्याच्या माध्यमातून गोव्याच्या समृद्ध आणि बहुसांस्कृतिक परंपरेचा प्रचार करत आहे. 'किंग मोमो' च्या आनंदभरल्या हाकेसह गोवा कार्निव्हल २०२५ हा रंग, ताल आणि उत्सवाच्या ऊर्जेचा एक भव्य सोहळा ठरणार आहे.