Mormugao Municipality Waste Segregation Training: मुरगाव पालिका क्षेत्रातील शाळांमध्ये कचरा वर्गीकरणाचे चार टप्पे; प्रशिक्षण कार्यक्रमाला मोठा प्रतिसाद

वास्को: मुरगाव पालिकेने पालिका क्षेत्रातील शाळांमधील विद्यार्थी व शिक्षकांसाठी आयोजित केलेल्या कचरा वर्गीकरणाच्या चार पद्धतींच्या प्रशिक्षण कार्यक्रमाला चांगला प्रतिसाद मिळाला. या प्रशिक्षणात सहभागी झालेले विद्यार्थी व शिक्षक आता आपल्या शाळेतील इतर विद्यार्थ्यांना व शिक्षकांना प्रशिक्षण देणार आहेत.

मुरगाव पालिकेने या प्रशिक्षण कार्यक्रमासाठी प्रत्येक शाळेतून पाच विद्यार्थी आणि दोन शिक्षकांना निमंत्रित केले होते. ओल्या व जैवविघटनशील कचऱ्यासाठी हिरव्या कचरापेटीचा वापर करावा. यामध्ये उरलेले अन्नपदार्थ, भाज्या, फळांच्या साली, चहापत्ती तसेच बागेतील कचऱ्याचा समावेश होतो. या कचऱ्यावर कंपोस्ट खताची प्रक्रिया केली जाते. सुका कचरा टाकण्यासाठी निळ्या कचरापेटीचा वापर करावा.

दरम्यान, या प्रशिक्षित विद्यार्थी व शिक्षकांनी आपल्या शाळेतील इतर विद्यार्थी आणि शिक्षकांसाठीही प्रशिक्षण कार्यक्रम आयोजित करावा. प्रशिक्षण पूर्ण झाल्यानंतर त्यासंबंधीचे व्हिडिओ आणि छायाचित्रे शाळेच्या नावासह पाठवावीत, जेणेकरून ती मंत्रालयाच्या पोर्टलवर तसेच इन्स्टाग्राम आणि एक्स (पूर्वीचे ट्विटर) या समाजमाध्यमांवर अपलोड करता येतील, असे पालिका मुख्याधिकारी सिद्धीविनायक नाईक यांनी परिपत्रकात म्‍हटले आहे.

उत्तम सादरीकरण

विद्यार्थ्यांना विविध कचरापेट्यांविषयी माहिती देण्यासाठी पॉवरपॉइंट सादरीकरणाचा वापर करण्यात आला. यावेळी विद्यार्थी व शिक्षकांनी विचारलेल्या प्रश्नांना समर्पक उत्तरे देण्यात आली. कचऱ्याचे वर्गीकरण केल्यामुळे कचरा उचलणे सुलभ होते तसेच तो योग्य ठिकाणी त्वरित पाठविण्यास मदत होते, अशी माहिती देण्यात आली.

लाल, काळी कचरापेटी

लाल कचरापेटीचा वापर अस्वच्छ कचऱ्यासाठी केला जातो. त्यामध्ये वापरलेले डायपर, सॅनिटरी पॅड, टॅम्पॉन तसेच इतर तत्सम वस्तूंचा समावेश असतो. या वस्तूंची विल्हेवाट लावण्यापूर्वी त्या सुरक्षितपणे गुंडाळल्या पाहिजेत. काळ्या डब्याचा वापर घरगुती धोकादायक कचऱ्यासाठी केला जातो. यामध्ये रंगांचे डबे, बल्ब, पारा असलेले थर्मामीटर, मुदत संपलेली औषधे व तत्सम इतर वस्तूंचा समावेश आहे.