Russian Woman Assault: रशियन महिला पर्यटकाला खोलीत घुसून मारहाण, दात पडून गंभीर दुखापत; पुराव्याअभावी संशयितांची सुटका

पणजी: मोरजी येथील एका हॉटेलमध्ये घुसून रशियन महिला पर्यटकाला मारहाण केल्याच्या आरोपातून पेडणे येथील प्रथम श्रेणी न्यायदंडाधिकारी न्यायालयाने शुक्रवारी दोघांची निर्दोष मुक्तता केली. पुराव्यांचा अभाव आणि मुख्य साक्षीदारांच्या अनुपस्थितीमुळे न्यायालयाने हा निकाल दिला.

२४ मार्च २०२३ रोजी पहाटेच्या सुमारास मोरजी येथील ''हॉटेल ग्रँड इन'' मध्ये ही घटना घडली होती. आरोपी अबिनाश गोरिया (२९, आसाम) आणि मोहम्मद खान (२६, झारखंड) यांनी रशियन पर्यटकाच्या खोलीत शिरून तिला मारहाण केल्याचा आरोप होता. या हल्ल्यात पीडितेचा दात पडला होता आणि ओठाला गंभीर दुखापत झाली होती.

पोलिसांनी संशयितांविरुद्ध आयपीसी कलम ३२५ आणि ३४ अंतर्गत गुन्हा नोंदवला होता. या खटल्याच्या सुनावणीदरम्यान तपास अधिकारी पोलीस उपनिरीक्षक सुमेधा महाले यांनी पंचनामा आणि वैद्यकीय प्रमाणपत्रे सादर केली. मात्र, ज्या रशियन महिलेने तक्रार केली होती, ती साक्ष देण्यासाठी न्यायालयात हजर राहू शकली नाही.

तक्रारदाराला या घटनेशी संशयितांचा थेट संबंध जोडणारे इतर ठोस पुरावेही सादर करता आले नाहीत .न्यायाधीश शबनम नागवेकर यांनी निकालात नमूद केले की, घडलेल्या प्रकाराची सत्यता स्पष्ट करण्यासाठी तक्रारदार हीच सर्वात महत्त्वाची साक्षीदार होती.

तिची साक्ष नसल्याने सरकारी पक्षाची बाजू पूर्णपणे कमकुवत ठरली आहे. केवळ संशयावरून कोणालाही दोषी ठरवता येत नाही. पुराव्यांच्या अभावी न्यायालयाने फौजदारी प्रक्रिया संहिता कलम २४८(१) अन्वये दोन्ही आरोपींची सुटका करण्याचे आदेश दिले.