Cutbona Jetty: कुटबण जेटीवरील सर्व मजुरांची तपासणी आवश्यक! जास्त मजूर मृत्युमुखी पडल्याची शक्यता

सासष्टी: कुटबण जेटीवर पाच मजुरांचा मृत्यू झाला, अशी नोंद केली असली तरी प्रत्यक्षात जास्त मजूर मृत्युमुखी पडल्याची माहिती समोर येत आहे. येथे कॉलरा व इतर रोगांमुळे मच्छीमार मजुरांवर जी परिस्थिती ओढवली आहे त्याची माहिती मुख्यमंत्री डॉ. प्रमोद सावंत यांना देणार आहे, असे आमदार क्रुझ सिल्वा यांनी सांगितले.

क्रुझ सिल्वा म्हणाले की, काही मजुरांवर बाळ्ळी प्राथमिक आरोग्य केंद्रामध्ये उपचार सुरू आहेत. काहींना जिल्हा इस्पितळात तर काहींना बांबोळी-गोवा वैद्यकीय इस्पितळात दाखल केल्याची माहिती आहे. मात्र, प्रत्यक्षात काय परिस्थिती आहे त्याची जाणीव कुणालाच नाही. मुख्यमंत्री व मत्स्यव्यवसाय खात्याच्या मंत्र्यांची भेट घेऊन त्यांना माहिती देण्यात येईल.

शनिवारी केळशी व परिसरातील काही नागरिक आमदार क्रुझ सिल्वा यांना भेटले. या नागरिकांनी येथील परिस्थिती गंभीर असून स्थानिकांना त्याची झळ बसण्यापूर्वी तत्काळ उपाययोजना आवश्यक असल्याची मागणी केली. २००७ पासून कुटबण जेटीवरील उपआरोग्य केंद्र बंद आहे. ते पुन्हा सुरू करणे गरजेचे आहे. शिवाय डॉक्टर, ॲम्ब्युलन्स सेवा आदीची व्यवस्थाही आवश्यक आहे.

वेळेत उपचार गरजेचे

कुटबण जेटीवरील मजुरांच्या रक्ताची चाचणी केली आहे व काहींना कॉलरा झाला असल्याचे त्यातून निष्पन्न होत आहे. या मजुरांवर तत्काळ उपचार आवश्यक आहेत. बोटमालकांनी लवकरात लवकर आपल्या सर्व मजुरांची माहिती द्यावी. त्यांची वेळेत तपासणी होणे गरजेचे असल्याचे वैद्यकीय अधिकारी डॉ. बेनेदिता डायस यांचे म्हणणे आहे.

तोपर्यंत जेटी बंद ठेवा!

कुटबण जेटीवर जी आरोग्यविषयक समस्या आहे, त्याबाबत केळशीतील नागरिकांमध्ये भीती आहे. संबंधित खात्याने या जेटीवरील मच्छीमार व्यवसाय तात्पुरता खंडित करावा. जोपर्यंत पूर्ण उपाययोजना होत नाही किंवा मजुरांचे आरोग्य सुधारत नाही तोपर्यंत ही जेटी बंद ठेवावी, अशी मागणी स्थानिक रुझारियो फर्नांडिस यांनी केली आहे.