Cutbona Jetty: वापरात नसलेल्या बोटी तीन दिवसांत हटवा! कुटबण-मोबोरबाबतीत उपजिल्हाधिकाऱ्यांचा आदेश

सासष्टी: कॉलरा व डेंग्यूच्या आजाराने कुटबण व मोबोर जेटीवरील मजुरांचे आरोग्य बिघडले आहे. काहीजण मृत्युमुखी पडले आहेत. तेथील परिस्थिती हालाकीची असल्याचे दिसून आल्याने गेल्या चार वर्षांतील ज्या वापरात नसलेल्या बोटी जेटीवर ठेवलेल्या आहेत त्या तीन दिवसांत साफ करण्याचा व हटविण्याचा आदेश उपजिल्हाधिकारी गणेश बर्वे यांनी दिला आहे.

उपजिल्हाधिकारी गणेश बर्वे यांच्या नेतृत्वाखाली आमदार क्रुझ सिल्वा, आरोग्य केंद्राच्या डॉ. बेनोदीत डायस, बोट मालक विनय तारी, ‘गोवा कॅन’चे रोलांड मार्टिन्स, सावियो डिसिल्वा तसेच एफडीए, आरोग्य खात्याच्या अधिकाऱ्यांनी कुटबण व मोबोर जेटीची पाहणी केली. कुटबण व मोबोर जेटीवर जवळपास १०० डेंग्यू व कॉलराचे रुग्ण असल्याचे बोलले जात आहे. कुटबण जेटीवर चार मच्छीमार मजुरांचा मृत्यू झाला आहे.

दरम्यान, प्राथमिक आरोग्य खात्याच्या अधिकारी डॉ. बेनोदीत डायस यांनी सांगितले की, आमचे शर्थीचे प्रयत्न सुरू आहेत. इथे डेंग्यूचे ९ रुग्ण आहेत, मलेरियाचा एकही नाही. आम्ही दोन हजार मजुरांची तपासणी केली आहे. अशाप्रकारचे आजार न होण्यासाठी स्वच्छता हा परिणामकारक उपाय आहे.

सावियो डिसिल्वा यांनी सांगितले की, मत्स्यव्यवसाय खात्याच्या दुर्लक्षामुळेच रोगराई वाढली आहे. बोट मालक विनय तारी म्हणाले की, येथील परिस्थिती नियंत्रणाखाली आणण्यासाठी प्रयत्न सुरू आहेत.

आवश्‍यक माहिती गरजेची

‘गोवा कॅन’चे निमंत्रक रोलांड मार्टिन्स यांनी सांगितले की, वापरात न येणाऱ्या बोटी आणि मजुरांची माहिती ही गरजेची आहे. मात्र, त्याची काहीही नोंद नाही. स्वच्छतेसाठी स्थानिक पंचायतीला पावले उचलण्यास सांगितले आहे. प्राथमिक आरोग्य खाते तर बिनकामाचे आहे. ग्राहक संरक्षण कायद्याखाली आम्ही हे प्रकरण हाताळणार असून सर्व संबंधित एजन्सीना नोटिसा पाठविल्या जातील.