Vaccination: गोव्यात 5 हजारापेक्षा अधिक मुलांनी घेतला लसीकरणाचा लाभ

Vaccination: कोरोना प्रतिबंधात्मक उपाययोजना म्हणून सरकारने 15 ते 18 वयोगटातील मुलांच्या लसीकरणाला सुरुवात केली आहे. याच पार्श्वभूमीवर गोव्यात आज पहिल्या दिवशी 5 हजारांपेक्षा अधिक 15 ते 18 वर्षे वयोगटातील मुलांनी कोविडची पहिली लस (Vaccination) घेतल्याची माहिती लसीकरण मोहिमेच्या प्रमुख डॉ. आयरा आल्मेदा यांनी दिली.

उद्या दुपारपर्यंत लस घेतलेल्या सर्व मुलांचा आकडा कळू शकेल. मात्र या मोहिमेला राज्यात चांगले यश मिळाल्याचा दावा त्यांनी केला. फक्त दोन मुलांना सुई टोचल्यावर भोवळ आल्या सारखे वाटले. पण अन्य कुणावरही लसीचा दुष्परिणाम जाणवला नाही, असे त्यांनी सांगितले.

मडगावात आज बोर्डा येथे मल्टिपर्पज शिक्षण संकुलात झालेल्या लसीकरण मोहिमेत 548 मुलांनी लस घेतली असल्याची माहिती मडगाव आरोग्य केंद्राचे प्रमुख डॉ. सुकुर क्वाद्रुश यांनी दिली. यातील फक्त एका मुलाला भोवळ आल्या सारखे वाटल्याने त्याला इस्पितळात देखरेखीखाली ठेवण्यात आले होते.