Pink Rickshaw Goa : गोव्यात आठ लाभार्थ्यांना दिल्या पिंक रिक्षा

Pink Rickshaw Goa : पिंक रिक्षा मोहीम ही रोटरी कल्बतर्फे राबवली असून स्वातंत्र्यदिनानिमित्त मिरामार येथील गास्पर डायस येथे आठ लाभार्थींना मुख्यमंत्री डॉ. प्रमोद सावंत यांच्या हस्ते पिंक रिक्षा देण्यात आल्या. यावेळी ईडीसीचे अध्यक्ष सदानंद शेट तानावडे, महापौर रोहित मोन्सेरात, रोटरी क्लबचे प्रमुख गौरीश धोंड उपस्थित होते.

राज्यात पोलिस पिंक फॉर्स सुरू करण्याचा निर्णय आमच्या सरकारने घेतला होता. सुरवातीला याला विरोध झाला, परंतु आता स्थानिक आणि पर्यटकांनी देखील याला स्वीकारले आहे. ईडीसीमार्फत 3 टक्के व्याज दराने कर्ज दिले जात आहे. तसेच अनुसूचित जमातीतील महिलांना 2 टक्के व्याजदराने कर्ज देण्याची तरतूद केली आहे. याचा लाभ महिलांनी पुढे येऊन घेतला पाहिजे, असे असे मुख्यमंत्री म्हणाले.

देशाच्या स्वातंत्र्याचे अमृत महोत्सवी वर्ष असल्याने स्वयंरोजगार आणि कौशल्य आधारित रोजगार करण्याचे धोरण राज्यात राबवले आहे. पुढील पाच वर्षांत हॉटेल उद्योगात दोन लाख नोकऱ्या निर्माण केल्या जाणार आहेत. त्यासाठी या संधीचा लाभ घेणे आवश्‍यक आहे, असेही मुख्यमंत्री म्हणाले.