मोपा लिंक रोड ठरतोय चालकांसाठी डोकेदुखी

मोरजी: मोपा लिंक रोडचे काम भरपावसात सुरू असल्यामुळे उड्डाणपुलासाठी खोदण्यात आलेल्या खड्ड्यांमध्ये मोठ्या प्रमाणात पाणी साचले आहे. डोंगर माळरानावरील आणि अन्‍यत्र माती रस्त्यावर येऊन मुख्य रस्ते वाहतुकीसाठी धोकादायक बनले आहेत. याकडे अजून सरकारचे लक्ष नसल्याने नागरिक तीव्र नाराजी व्यक्त करताना दिसत आहेत. (Mopa Link Road is dangerous for drivers)

नागझर जंक्शन ते मोपा विमानतळ या मुख्य रस्त्यावर ठिकठिकाणी खोदकाम भरपावसातही सुरू आहे. या कामामुळे वाहनचालकांना त्याची बरीच झळ बसत आहे. दुसऱ्या बाजूने मोपा लिंक रस्त्यासाठी धारगळ सुकेकुळण ते मोपा विमानतळ लिंक रस्त्याचे काम सुरू आहे.

खोदलेल्या खड्ड्यातील मातीचा व्यवस्थित निचरा न केल्याने ही माती मुख्य रस्त्यावर पाण्याच्या प्रवाहाबरोबर वाहून येत असल्याने अपघाताला कारणीभूत ठरत आहे. दरम्‍यान, खोदकाम केलेल्या खड्ड्यांमध्ये मोठ्या प्रमाणात पाणी साचले आहे. अपघातापूर्वी त्वरित उपाययोजना करावी अशी मागणी केली जात आहे (Goa Marathi News)