Mopa International Airport : ‘मोपा’ला आंतरराष्ट्रीय विमानसेवेची प्रतीक्षाच

Mopa International Airport : उत्तर गोव्यातील महत्त्वाकांक्षी प्रकल्प म्हणून ओळखल्या जाणाऱ्या मनोहर आंतरराष्ट्रीय विमानतळावरून सुरू होणारी आंतरराष्ट्रीय विमानसेवा लांबणीवर पडली असून आता मे महिन्याअखेर ही सेवा सुरू होण्याची शक्यता आहे.

राज्य नागरी विमान खात्याकडून दिलेल्या माहितीनुसार, 11 डिसेंबर 2022 रोजी पंतप्रधानांच्या हस्ते उद्‌घाटन करण्यात आलेल्या या विमानतळावरून जानेवारीपासून देशांतर्गत विमानसेवेला सुरुवात झाली आहे.

सध्या काही विमान कंपन्या या विमानतळावरून आपली सेवा देत आहेत. यात इंडिगो, गो-एअर आणि अक्सा या विमान कंपन्यांचा समावेश आहे. सध्या देशातीलच 9 शहरांना या विमानतळावरून सेवा (कनेक्टिव्हिटी) सुरू आहे.

25 मार्चनंतर ही सेवा दुप्पट होणार असून मार्चच्या शेवटच्या आठवड्यात आंतरराष्ट्रीय विमान सेवा सुरू होण्याची शक्यता होती. मात्र, ती लांबणीवर पडली असून मे अखेरपर्यंत ती सुरू होण्याची शक्यता आहे.

जीएमआर कंपनीच्या सूत्रांनुसार, कंपनीने जगभरातल्या अनेक विमान कंपन्यांशी यासंबंधीचे करार केलेले आहेत. आणि आंतरराष्ट्रीय ठिकाणे (डेस्टिनेशन) यांचीही निवड केली आहे.

सुरुवातीच्या टप्प्यात युरोप, रशिया, मध्य आशियाई देशांबरोबर दक्षिण पॅसिफिक देशांमध्ये आंतरराष्ट्रीय विमानसेवा सुरू होणार आहे.

कस्टम, इमिग्रेशनसाठी विलंब

कोणत्याही विमानतळावरून आंतरराष्ट्रीय विमानसेवा सुरू करण्यासाठी केंद्र सरकारच्या कस्टम आणि परराष्ट्र व्यवहार मंत्रालयाच्या इमिग्रेशन विभागाची परवानगी लागते. याशिवाय या दोन्हीही विभागांचे स्वतंत्र कक्ष उभारणे अपेक्षित असते.

या विमानतळावरील ब्लॉक सी आणि ब्लॉक डी हे दोन विभाग या सेवेसाठी राखीव ठेवण्यात आले आहेत. या सुविधांकरताच आंतरराष्ट्रीय विमानसेवेला विलंब होत आहे.