Mopa International Airport : प्रतीक्षा वाढली; मोपा विमानतळाचा मुहूर्त लांबणीवर

पणजी : मोपा आंतरराष्ट्रीय विमानतळावरून उड्डाण करण्याचा 15 ऑगस्टचा मुहूर्त लांबणीवर पडला आहे. त्यामुळे या उड्डाणाच्या नव्या मुहुर्ताची घोषणा सप्टेंबरमध्ये करण्यात येईल. या उड्डाणाचे पहिल्या टप्प्यातील काम अजूनही पूर्ण झाले नसल्याची माहिती मुख्यमंत्री डॉ. प्रमोद सावंत यांनी पत्रकारांनी विचारलेल्या एका प्रश्‍नावर उत्तर देताना दिली.

मुख्यमंत्री डॉ. प्रमोद सावंत यांनी येत्या 15 ऑगस्टला ‘आझादी का अमृत महोत्सव’ साजरा करताना मोपा विमानतळाचे उद्‍घाटन पंतप्रधान नरेंद्र मोदी यांच्या हस्ते होणार असल्याची घोषणा वेळोवेळी केली होती. मात्र कोरोना काळात रेंगाळलेले काम प्रगतिपथावर येण्यास उशीर होत असल्याने हे उद्‍घाटन आता लांबणीवर पडणार आहे असे स्पष्ट केले. या विमानतळासाठी लागणारा कर्मचारीवर्ग हा 80 टक्के गोव्यातीलच असेल अशीही त्यांनी घोषणा केली आहे. काही कर्मचाऱ्यांना विमानतळावरील सुरक्षा व इतर कामे हाताळण्याचे प्रशिक्षण देऊन तत्पर ठेवण्यात आले आहे.

विमानतळासाठी ज्यांच्या जमिनी ताब्यात घेण्यात आल्या आहेत, त्या कुटुंबीयांच्या सदस्यांना प्राधान्य दिले जाणार असल्याचे त्यांनी घोषित केले असले तरी स्थानिकांकडून इतर मतदारसंघांतील अधिक उमेदवारांना संधी देण्यात आली असल्याची टीका होत आहे.

मोपावर प्राधान्‍य गोवेकरांनाच
मोपा विमानतळासाठी आवश्‍यक असलेला कर्मचारीवर्गात स्‍थानिकांना प्राधान्‍य दिले जाईल. मात्र प्रशिक्षित आणि उच्चपदस्‍थ जागा भरताना गुणवत्तेचा आधार घ्‍यावा लागत असला तरीसुद्धा प्राधान्‍यक्रम भूमिपुत्रांनाच द्यावा लागेल. त्‍यानंतर ते इतरांचा विचार करू शकतील, असं बोललं जात आहे.