Tambdi Surla Mahadev Temple: नुकसान करताहेत माकडं मात्र भुर्दंड सोसताहेत गाडेधारक... नेमका काय प्रकार?

Tambdi Surla Mahadev Temple साकोर्डा पंचायत यांनी तांबडीसुर्ला येथे असलेल्या 16 गाडे धारकांना कचरा करीत असल्याचे निमित्त धरून कारवाई करण्यासंदर्भात नोटीस बजावली असल्याने गाडे धारकांनी पंचायतच्या विरोधात नाराजी व्यक्त केली आहे.

रोजगार नसल्याने व आर्थिक बाबतीत कमकुवत असल्याने पंचायतने आम्हाला दिलासा ध्यावा अशी मागणीही गाडे धारकांनी केली आहे.

धारबांदोडा तालुक्यातील तांबडीसुर्ला येथील जगप्रसिद्ध असलेल्या महादेव मंदिराजवळ गाडे धारकांचा प्रश्न एरणीवर आला आहे. परिसरात कचरा होत असल्याने स्थानिक पंचायत मंडळाने गाडे धारकांना नोटीस पाठवून यापुढे दंडात्मक कारवाई करण्याचा इशारा दिला आहे.

मात्र परिसरात असलेल्या रानटी मर्कट (खेती) रात्रीच्यावेळी कचरापेटीला कुलुप नसल्याने कचरापेटीतील कचरा बाहेर काढून अस्ताव्यस्त टाकत आहे, त्यामुळे हा परिसर विद्रूप होत असल्याची तक्रार घेऊन पंचायतने नोटीस पाठविल्याने गाडे धारक अडचणीत आले आहे.

स्थानिक पंचायत मंडळ व आमदारांनी या विषयाकडे लक्ष देऊन तोडगा काढण्याची मागणी करीत आम्हाला दिलासा ध्यावा अशी मागणीही गाडे धारकांनी केली.

मंदिरात सुटीच्या दिवसात अधिक प्रमाणात पर्यटक येत असल्याने स्थानिक लोकांचा व्यवसाय तेजीत येतो. सुमारे 16 गाडे धारकांना पंचायतीने परवाना दिलेला आहे. पण त्यापैकी 7-8 जण व्यवसायात उतरले आहे.

परंतु परिसरात होणाऱ्या कचऱ्यामुळे समस्या निर्माण होत आहेत. या गाडे धारकांच्या आवारात अधिक संख्येने असलेले वानर रात्रीच्यावेळी कुंड्यातील कचरा बाहेर टाकून देतात. सुमारे 50हून अधिक वानर या परिसरात वावरत असून त्यांचा त्रास पर्यटकांना सुद्धा होत आहे. त्यामुळे गाडेधारकांची डोकेदुखी वाढली आहे.

गाडेधारक असे म्हणतात:-

आनंद गांवकर यांनी सांगितले की या परिसरात साफसफाई करून आम्ही सर्व गाडेधारक कचरा कुंडीत टाकतात. तसेच हा परिसरही स्वच्छ ठेवतात पण पंचायत कचरा उचलण्यास उशीर करीत आहेत. दर आठवड्याला हा कचरा उचलला जावा तसेच कुलुप लावलेल्या कचरा पेट्या आम्हाला द्याव्यात अशी मागणीही गाडे धारकांनी केली.