सरकारी मराठी शाळा टिकण्यासाठी पाल्यांना मराठी शाळेतच पाठवावे : आमदार प्रवीण आर्लेकर

मराठी सरकारी शाळा टिकून ठेवण्यासाठी प्रत्येक पालकाने आपल्या पाल्यांना सरकारी मराठी शाळेतच अभ्यासासाठी पाठवावे. आज 40 मुले आहेत, पुढच्या वर्षी संख्या शंभर कशी होणार, याकडे लक्ष केंद्रित करावे, असे आवाहन पेडणे मतदारसंघाचे आमदार प्रवीण आर्लेकर यांनी केले.

तोरसे येथील सरकारी प्राथमिक विद्यालयाच्या वार्षिक स्नेहसंमेलनात प्रमुख पाहुणे ते बोलत होते. व्यासपीठावर तोरसे सरपंच प्रार्थना मोटे, माजी सरपंच सूर्यकांत तोरस्कर, पंच सदस्या स्वाती तोरस्कर, उपसरपंच उत्तम वीर, छाया शेट्ये, स्वाती तोरस्कर, पूजा साटेलकर, विजय तोरस्कर, रमेश बुटे, सीआरपी स्नेहा मोटे, काशिबाई परब, मुख्याध्यापिका सज्जना कोरगावकर आदी उपस्थित होते.

यावेळी विद्यार्थ्यानी विविध संस्कृतिक कार्यक्रम सादर कलागुणांचे प्रदर्शन केले. पाहुण्याच्या हस्ते विजेत्यांना बक्षिसे देण्यात आली. प्रास्ताविक मुख्याध्यापिका कोरगावकर, परिचय उपासना सावंत, सूत्रसंचालन राखी सावंत, संध्या परब यांनी केले.

शाळेसाठी उभारणार पक्का रंगमंच

सरकारी प्राथमिक विद्यालय तोरसे यांचे स्नेहसंमेलन गत ४० वर्षापासून बंद होते. यंदा प्रथमच तात्पुरत्या स्वरूपाचा रंगमंच आमदार आर्लेकर यांनी उभारून दिल्यानंतर हा कार्यक्रम घेण्यात आला. पुढील वर्षापासून याच ठिकाणी पक्का रंगमंच शाळेसाठी उपलब्ध असेल, अशी ग्वाही आर्लेकरांनी दिली.