ESG: गोवा मनोरंजन संस्थेचा नवीन गोंधळ! गाजलेल्या ‘जुझे’ फिल्मच्या टीमकडून पुरस्कार परत; वादग्रस्त अहवाल हटवला

पणजी: गोवा मनोरंजन संस्थेने गोमंतकीय सिनेमा निर्मितीच्या बाबतीत एखादी गोष्ट जाहीर करायची आणि वादाला निमंत्रण द्यायचे, ही गोष्ट आता काही नवीन राहिलेली नाही.

‘गोमंतकीय सिनेमा निर्मिती अनुदान’ संबंधात ठरवले जाणारे निकष असो किंवा जाहीर झालेले अनुदान असो, त्यात घोटाळा असायलाच हवा असा काहीतरी नियमच जणू या संस्थेने केला आहे आणि याचेच उदाहरण म्हणून या संस्थेच्या संकेत स्थळावर  परवा दाखल झालेला आणि त्यातील विसंगतीवर एका दिग्दर्शकाने आवाज उठवल्यामुळे काल तत्परतेने काढून टाकलेला चित्रपट मूल्यांकन समितीचा अहवाल हे अशाच एका घोटाळ्याचे आणि गोंधळाचे ताजे उदाहरण आहे. 

''गोमंतकीय चित्रपटांना आर्थिक अनुदान'' या योजनेखाली अर्ज दाखल केलेल्या चित्रपटांचे मूल्यांकन करून त्यासाठी नेमलेल्या पाच सदस्यीय समितीने जो अहवाल सादर केला होता, तो परवाच्या दिवशी गोवा मनोरंजन संस्थेच्या संकेतस्थळावर झळकला होता.

या अहवालात जानेवारी २०१६ ते डिसेंबर २०२३ पर्यंत बनलेल्या गोमंतकीय (मराठी आणि कोकणी) चित्रपटांना अ, ब, क अशा विविध श्रेणी देण्यात आल्या आहेत. या श्रेणीनुसार चित्रपट निर्मात्यांना रोख रकमेचे अनुदान मिळणार आहे. या अहवालात काही सिनेमांना अनुदान नाकारले देखील गेले आहे. 

मात्र, या अहवालात ‘जुझे’ या आंतरराष्ट्रीय स्तरावर गाजलेल्या, अनेक महत्त्वाच्या राष्ट्रीय तसेच आंतरराष्ट्रीय चित्रपट महोत्सवात निवडल्या गेलेल्या, अनेक पुरस्कार प्राप्त झालेल्या चित्रपटाला ‘क’ ही अगदी खालची देण्यात आलेली श्रेणी अनेक चित्रपट रसिकांसाठी ही अनपेक्षित बाब होती. त्यामुळे या अहवालासंबंधी लगेच सर्वत्र चर्चा सुरू झाली.

‘क’ ही सर्वांत खालची श्रेणी मिळणे, ही या चित्रपटाचे निर्माते व दिग्दर्शक मिरांशा नाईक यांच्यासाठीही धक्कादायक गोष्ट होती. त्यांनी या गोष्टीचा निषेध म्हणून गुरुवारी गोवा मनोरंजन संस्थेच्या व्यवस्थापिका मृणाल वाळके यांना भेटून आपले पुरस्कार परत केले. 

चित्रपट मूल्यांकन अहवालाबद्दल सर्वत्र साशंकता निर्माण होत आहे, हे लक्षात येताच संस्थेच्या संकेतस्थळावरून लागलीच हा अहवाल हटवण्यात आला.  धक्कादायक बाब म्हणजे व्यवस्थापिका मृणाल वाळके यांनी या अहवालाचे पुनर्मूल्यांकन करण्याचे आश्वासनही मिरांशा नाईक यांना दिले आहे.

त्यामुळे या अहवालाबद्दल आता अनेक प्रश्न निर्माण झाले असून गोवा मनोरंजन संस्था या कोंडीतून कशी बाहेर पडणार, हा प्रश्न आहे. मात्र, या संस्थेची आजवरची कार्यपद्धती पाहता दिलेल्या आश्वासनाची पूर्तता करण्याबाबत ते फारसे गंभीर असतील असे वाटत नाही, असेच बोलले जात आहे. 

मिरांशा नाईक हे युवा गोमंतकीय चित्रपट दिग्दर्शक असून त्यांनी आतापर्यंत तीन चित्रपट निर्माण केले आहेत. त्यांचा तिसरा चित्रपट प्रदर्शनाच्या मार्गावर आहे. त्यांच्या ‘जुझे’ (कोकणी) आणि ‘वाट’ (मराठी) या चित्रपटांनी आंतरराष्ट्रीय स्तरावर प्रशंसा मिळवली आहे.

चित्रपट मूल्यांकन समितीने ‘क’ दर्जा दिलेला त्यांचा ‘जुझे’ हा चित्रपट हाँगकाँग आंतरराष्ट्रीय चित्रपट महोत्सव, कार्लोवी वेरी चित्रपट महोत्सव, मुंबई चित्रपट महोत्सव, इफ्फी, मिंस्क चित्रपट महोत्सव, डब्ल्यू आंतरराष्ट्रीय चित्रपट महोत्सव आदी प्रतिष्ठित महोत्सवांमध्ये प्रदर्शित झाला आहे. विशेष म्हणजे, ‘एनएफडीसी’च्या वार्षिक फिल्म बाजारात या चित्रपटाचे प्रभावी सादरीकरण करून त्यांनी नेदरलँड आणि फ्रान्समधील निर्मिती कंपनीकडून या चित्रपटासाठी प्रारंभिक निधी मिळवला होता.