‘पर्यटना’साठी अभिनव तंत्राचा वापर : मंत्री खंवटे

गोव्यातील पर्यटन क्षेत्राच्या व्यापक विकासासाठी गोवा आणि पोर्तुगाल अभिनव तंत्रज्ञानाचा वापर करणार असल्याचे पर्यटनमंत्री रोहन खंवटे यांनी जाहीर केले आहे. लवकरच गोवा व पोर्तुगाल यांच्यात पर्यटन आणि माहिती तंत्रज्ञानविषयक सामंजस्य करार केला जाईल, असे प्रसिध्दीस दिलेल्या पत्रकात म्हटले आहे.

मंत्री खंवटे सध्या पोर्तुगालच्या दौऱ्यावर असून तेथे गोव्यातील पर्यटन क्षेत्राच्या विकासासंदर्भात या क्षेत्रातील विविध दावेदारांसमवेत बैठका घेतल्यानंतर त्यांनी ही माहिती दिली.

मंत्री खंवटे 1 मार्चपासून पोर्तुगालच्या दौऱ्यावर असून त्यांनी पोर्तुगालचे वित्तमंत्री आंतोनिओ कॉस्ता यांची भेट घेऊन पर्यटन तसेच माहिती तंत्रज्ञान क्षेत्रातील विषयांवर चर्चा केली. पोर्तुगाल व गोवा यांच्यात पर्यटन क्षेत्रातील भावी सहकार्याबाबत प्रामुख्याने चर्चा झाली.

पर्यटन क्षेत्रातील विकासाबाबतच्या शक्यतांवर या चर्चेचा भर होता आणि त्याविषयी उभयतांनी विचारांचे आदानप्रदान केले,असेही पत्रकात म्हटले आहे. खंवटे यांनी या दौऱ्यात पोर्तुगालच्या पर्यटन आणि वाणिज्य खात्याचे सचिव नुनो फाजेंदा यांच्याशी विविध विषयांवर चर्चा केली.

पोर्तुगाल-गोवा थेट हवाई मार्गासंबंधी चर्चा

पोर्तुगालमधील भारताचे राजदूत मनिष चौहान यांची खंवटे यांनी भेट घेतली आणि पर्यटन आणि माहिती तंत्रज्ञान क्षेत्रात भारत व पोर्तुगाल यांच्यात व्यवसाय आणि गुंतवणूक याबाबत शक्यतांवर चर्चा केली.

यावेळी खंवटे यांनी पोर्तुगाल आणि गोवा यांच्यादरम्यान नव्या हवाई मार्गासाठी संबंधितांशी चर्चा केली. ओशनारियो द लिज्बोआचे मुख्य कार्यकारी अधिकारी जोआव फाल्काव यांचीही खंवटे यांनी भेट घेतली. आपला पोर्तुगाल दौरा फलदायी ठरल्याचे खंवटे यांनी सांगितले.