Latambarcem Mine Raid: लाटंबार्सेत चिरेखाणीवर छापा; ट्रकसह यंत्रसामग्री जप्त

डिचोली: डिचोली तालुक्यातील लाटंबार्से पंचायत क्षेत्रातील उसप येथे एका बेकायदा चिरेखाणीवर खाण आणि भूगर्भ खात्याने छापा टाकून एका ट्रकसह चिरे काढण्याखाणी वापरण्यात येणारी यंत्रसामग्री जप्त केली. खाण खात्याच्या अधिकाऱ्यांच्या पथकाने पोलिसांच्या उपस्थितीत सोमवारी सायंकाळी ही कारवाई केली.

उसप येथील नियोजित आयडीसी परिसरात डोंगराळ भागात बेकायदा चिरेखाण चालत असल्याची माहिती मिळताच खाण खात्याच्या अधिकाऱ्यांनी या चिरेखाणीवर अचानक छापा टाकला. तेव्हा या चिरेखाणीवर चिरे काढण्याचे काम सुरू होते.

या छाप्यावेळी भरारी पथकाने चिरे काढण्यासाठी वापरण्यात येणाऱ्या कटरसह पॉवर टिलर, जनरेटर आदी यंत्रसामग्री तसेच चिऱ्यांची वाहतूक करणारा एक ट्रक जप्त केला. जप्त केलेली यंत्रसामग्री डिचोली पोलिसांच्या देखरेखीखाली ठेवण्यात आली आहे.