'आरजी हे सतीश धोंड यांनी जन्माला घातलेले बाळ'

मडगाव : ‘आरजी’ या पक्षाला कुणी फारसे महत्त्व देण्याची गरज नाही. गोव्यात हा पक्ष प्रभावहीन असून ‘आरजी’ हे भाजपचे संघटनमंत्री सतीश धोंड यांनी जन्माला घातलेले बाळ आहे, असा आरोप राष्ट्रवादी कॉंग्रेसचे नुवेचे उमेदवार मिकी पाशेको यांनी केला. (Mickky Pacheco News Updates)

मिकी पाशेको (Mickky Pacheco) यांनी काल आपला उमेदवारी अर्ज भरला. नुवेत कुणीच माझ्याशी स्पर्धा करू शकत नाही. आप आणि तृणमूल (TMC) हे धर्मनिरपेक्ष मतांमध्ये फूट पाडण्यासाठीच मैदानात उतरले आहेत, हे सर्वांनाच माहीत आहे. ‘आरजी’ हा तर सतीश धोंड यांनी तयार केलेला पक्ष आहे. दक्षिण गोव्यातील ख्रिस्ती मतांमध्ये फूट पाडण्यासाठीच सतीश धोंड यांनी मनोज परब यांना पुढे आणले होते. आता तेच ‘पोगो, पोगो’ करत सगळीकडे फिरत आहेत, असे पाशेको म्हणाले.

काँग्रेसचे (Congress) उमेदवार आलेक्स सिक्वेरा यांच्याविषयी पाशेको म्हणाले, 2012 सालच्या निवडणुकीत मी त्यांना पराभूत केले होते. त्यावेळीच ते शरीराने थकले होते. अशा माणसाला 10 वर्षांनंतर उमेदवारी देऊन काँग्रेसने काय साध्य केले, तेच कळत नाही. त्यांना 100 मीटर चालले तरी थकवा येतो, असे पाशेको म्हणाले.