मायकल लोबोंचा अखेर मंत्रिपदाचा राजीनामा

पणजी : भाजपचे कळंगुटमधील आमदार आणि ग्रामीण विकास मंत्री मायकल लोबो यांनी अखेर मंत्रिपदाचा राजीनामा दिला आहे. सोमवारी सकाळी आपला मंत्रिपदाचा राजीनामा त्यांना मुख्यमंत्र्यांना सादर केला आहे. मंत्रिपदाच्या राजीनाम्यानंतर आमदारकीचाही राजीनामा लोबो यांनी विधानसभा अध्यक्षांना दिला आहे. (Michael Lobo Resigns from BJP)

मायकल लोबो (Michael Lobo) यांनी भाजपला सोडचिठ्ठी देत काँग्रेसवासी होण्याचा निर्णय घेतल्याची माहिती आहे. त्यामुळे मंत्रिपद आणि आमदारकीच्या राजीनाम्यानंतर रविवारी लोबो काँग्रेसमध्ये प्रवेश करण्याची शक्यता आहे. रविवारी सकाळी त्यांनी आपला मंत्रिपदाचा राजीनामा देऊन अखेर भाजपसमोर (BJP) एक नवीन आव्हान उभं केलं आहे.

मी गोव्याच्या मंत्रिपदाचा राजीनामा दिला आहे. कळंगुट मतदारसंघातील लोक माझ्या निर्णयाचा आदर करतील अशी आशा आहे. मी आमदारकीचाही राजीनामा देत आहे. पुढे काय पाऊल टाकायचे ते बघू. इतर पक्षांशी चर्चा सुरु आहे, असं मायकल लोबो यांनी राजीनाम्यानंतर स्पष्ट केलं आहे.

दरम्यान मायकल लोबोंनी मुख्यमंत्री कार्य़ालयात राजीनामा सादर केल्यानंतर माध्यमांशी संवाद साधला. यावेळी त्यांनी आपली भूमिका स्पष्ट करत भाजपविरोधात जाण्याचं कारणही स्पष्ट केलं आहे. तसेच कळंगुटमधील (Calangute) जनतेची सेवा करत राहणार असल्याचंही स्पष्ट केलं आहे. मायकल लोबोंनी आपली पत्नी डिलायला लोबो यांनाही निवडणुकीच्या रिंगणात उतरवण्याचा निर्णय घेतला आहे. शिवोलीमध्ये डिलायला यांचा जोरात प्रचारही सुरु आहे.