South Goa Constituency : दक्षिणेतील वीसही मतदारसंघात भेटीगाठी : दिगंबर कामत

South Goa Constituency :

सासष्टी, लोकसभा निवडणुकीसाठी भारतीय जनता पक्षाच्या दक्षिण गोवा मतदारसंघातील उमेदवार पल्लवी धेंपे यांनी वीसही मतदारसंघांतील कार्यकर्त्यांच्या भेटीगाठी घेऊन पहिली फेरी आज संपवली. या फेरीत भाजप कार्यकर्त्यांमध्ये उत्साह दिसला.

त्याच बरोबर सर्वच मतदारसंघांमध्ये चांगला प्रतिसाद लाभला, असे मडगावचे आमदार दिगंबर कामत यांनी आज सांगितले.

कोलवा येथील श्री महालक्ष्मी मंदिरातील कार्यकर्त्यांच्या बैठकीनंतर ते बोलत होते. पहिल्या फेरीत वीसही मतदारसंघांतील कार्यकर्त्यांकडे संपर्क साधण्यात आला व उमेदवार पल्लवी धेंपे यांची ओळख करुन देण्यात आली.

आज संध्याकाळी उमेदवार पल्लवी धेंपे यांनी आमदार दिगंबर कामत, माजी खासदार विनय तेंडुलकर, सरचिटणीस दामू नाईक, दक्षिण गोवा जिल्हा पंचायत अध्यक्ष सुवर्णा तेंडुलकर यांच्या समवेत प्रथम बाणावली व नंतर कुडतरी मतदार संघाचा दौरा केला. सरपंच पियो फर्नांडिस, उपसरपंच, पंच उपस्थित होते. या वेळी प्रेमानंद लोटलीकर व रोनी तावारीस या तियात्रिस्टांचा गौरव करण्यात आला.

कोलवा येथे पल्लवी धेंपे म्हणाल्या, पंतप्रधान मोदी यांच्या नेतृत्वाखालील केंद्र सरकारने लोकोपयोगी योजना राबवल्या. त्यामुळे विकास मोठ्या प्रमाणात झाला आहे.

कुडतरी, मायणा परिसरात दौरा

पल्लवी धेंपे यांनी आज कुडतरीचा दौरा केला. त्यानंतर राय येथील अवर लेडी ऑफ स्नो चर्चला भेट दिली.

त्यानंतर मायणा कुडतरीतील आलेग्रिया ओपन एअर सभागृहात कुडतरी मतदारसंघातील कार्यकर्त्यांना मार्गदर्शन केले व नंतर कुडतरीचे आमदार आलेक्स रेजिनाल्ड लॉरेन्सो यांच्यासह कार्यकर्ते व चाहत्यांना सांतेमळ देवस्थान मंडपात मार्गदर्शन केले.